काठमाडौं। पवित्र रिस्ता सिरियलवाट व्यापक चर्चा पाएका अभिनेता सुशान्त सिंह राजपुत मृत्यु प्रकरणमा नायिका रिया चक्रवर्तीलाई पक्राउ गरेको छ। भारतीय समाचार माध्यम जी न्यूजका अनुसार सुशान्तलाई रियाले लागुऔषध दिएको आरोपमा पक्राउ गरेको हो।
यस प्रकरण पछि बलिउडमा एक पछि अर्को गरेर लागुऔषध खरिद प्रकरणमा नायिकाहरु तानिन थालिएको छ। लागुऔषध खरिदकोको अनुसन्धान गरिरहेको भारतको नारकोटिक्स कन्ट्रोल ब्यूरो (एनसिबी)ले बुधबार चार जना बलिउड नायिकाहरुलाई बयानका लागि उपस्थित हुने आदेश दिएपछि बलिउडमा हंगामा मच्चिएको छ।
एनसिबीले बलिउडका ख्यातिप्राप्त नायिकाहरु दीपिका पादुकोण, श्रद्धा कपुर, रकुल प्रीत सिंह तथा सारा अलि खानलाई सोधपुछका लागि उपस्थित हुने आदेश दिएको हो।
भारतीय समाचार संस्था प्रेस ट्रस्ट अफ इण्डिया (पिटिआई)का अनुसार एनसिबीका वरिष्ठ अधिकारीले अभिनेत्री दीपिका पादुकोणलाई सोधपुछका लागि शुक्रबार बोलाइएको छ।
त्यसैगरी अभिनेत्री रकुल प्रीत, सुशान्तकी म्यानेजर रहिसकेकी श्रुति मोदी र डिजाइनर सिमोन खम्बाटालाई बिहीबार पेस हुने आदेश दिइएको छ भने साला अलि खान र श्रद्धा कपुरलाई शनिबार बोलाइएको छ। एनसिबीका वरिष्ठ अधिकारीले यस प्रकरणमा ट्यालेन्ट म्यानेजर जय साहले केही महत्वपूर्ण सूचना दिएको बताएका छन्।
यसअघि दीपका पादुकोणकी व्यवस्थापक करिश्मा प्रकाशलाई पनि जाँचका लागि बोलाइएको थियो। तर प्रकाशले आफ्नो स्वास्थ्य अवस्था ठीक नभएकाले यसका लागि केही समय मागेकी छन्। उनलाई शुक्रबारसम्मका लागि छुट दिइएको छ। प्रकाशको ह्वाट्सएप च्याटमा लागुपदार्थका बारेमा कुराकानी भएको पाइएको छ। यसअघि एनसिबीले सेप्टम्बर ८ मा लागुपदार्थ प्रयोग गरेको भन्दै अभिनेत्री रिया चक्रवर्तीलाई पक्राउ गरेको थियो।
मिडिया रिपोर्टहरूमा अभिनेत्री दीया मिर्जाको नामसमेत यस प्रकरणमा मुछिएको थियो तर यसलाई दीयाले अस्वीकार गरेकी छन्। उनले आफूले कहिले लागुऔषध सेवन नगरेको बताएकी छन्। योसँगै यस प्रकरणमा आफ्नो नाम जोडिएकोमा उनले कानुनी बाटो अपनाउने पनि जनाएकी छन्।
प्रकाशित मिति: बिहीबार, असोज ८, २०७७ ०९:२५
