काठमाडौ । ‘नेपाली सेना लघु चलचित्र प्रतियोगिता २०७८’मा ‘सेनाको चेली’ उत्कृष्ट लघु चलचित्र बन्न सफल भएको छ।
नेपाली सेना र विद्रोहीबीचको द्वन्द्व तथा त्यसपछिको मिलनलाई कथावस्तु बनाएर इङ्गिहोपो कोइँचले निर्माण गरेको उक्त लघु चलचित्रले पहिलो हुँदै २ लाख पुरस्कार प्राप्त ग¥यो ।
दुर्गाबहादुर कार्कीले निर्माण गरेको लघु चलचित्र ‘सेता मलामी’ दोस्रो र रविन तामाङले निर्माण गरेको लघु चलचित्र ‘डोल्मा’ तेस्रो हुँदै क्रमशः १ लाख ५० हजार र १ लाख पुरस्कार जितेको छ ।
लघु चलचित्र गौरव–२, फातिमा र गरिमाले सान्त्वना स्थान हासिल गरेको छ । प्रतियोगितामा ५१ लघु चलचित्रका लागि निवेदन परेकामा उत्कृष्ट १० लाई निर्माणको अनुमति दिइएको थियो ।
त्यसमा उत्कृष्ट ६ लघु चलचित्रले भने पुरस्कार पाएको हो । उक्त चलचित्रको मूल्याङ्कन समितिका सदस्य सरिता लामिछानेले छायाङ्कन, आवाज, वत्ती, सन्देश, सिर्जना र निर्देशन पक्षलाई ख्याल गरेर पुरस्कारका लागि लघु चलचित्र छनोट गरेको जानकारी दिए।
उत्कृष्ट फोटो
नेपाली सेनाले यसपटक सैनिक र गैरसैनिक विधामा फोटो प्रतियोगिता पनि आयोजना गरेको थियो । फोटो प्रतियोगितामा गैरसैनिकतर्फ फोटो पत्रकार वर्षा शाहको फोटो उत्कृष्ट भएको हो ।
उनको सेनाले बाढीमा परेकी एक बालिका उद्धार गरेर सुरक्षित गन्तव्यस्थलतर्फ लैजाँदै गरेको फोटोले पुरस्कार जितेको हो ।
दोस्रो समीप श्रेष्ठ र तेस्रो स्कन्द गौतम भएको छ । सैनिक जनसम्पर्क तथा सूचना निर्देशनालयतर्फ हुँदा ईश्वर खड्काको फोटो वर्षको उत्कृष्ट फोटो छनोट भएको छ ।
सैनिकतर्फ उत्कृष्ट १० फोटोलाई आजै पुरस्कृत गरिएको थियो । जसमा नं १४ बाहिनी अड्डा, वीरेन्द्र अस्पताल, प्रतिविद्रोह तथा जङ्गल वारफेयर शिक्षालय, बज्रदल गण, सैनिक सामग्री प्राप्ति निर्देशनालय, महाविर गण (रेञ्जर), युद्ध भैरव गण, युद्धकार्य निर्देशनालय, सैनिक विशेष इन्टेलिजेन्स निर्देशनालय र महाविर गण (रेञ्जर) रहेको छ ।
फोटो तथा विविध प्रदर्शनीतर्फ भैरवबहान गुल्म पहिलो, विशेष फौज बाहिनी दोस्रो, शार्दुलजङ्ग गुल्म तेस्रो भएको छ भने सिपाही जर्नल र शिवपूरी जर्नलमा धर्मबहादुर बानियाँको लेख पहिलो र तेस्रो तथा सत्बिन्दर सिंहको लेख दोस्रो हुँदै पुरस्कार प्राप्त गरेको छ ।
प्रधानसेनापति प्रभुराम शर्माको उपस्थितिमा सबै विजेतालाई पुरस्कार तथा प्रमाणपत्र वितरण गरिएको छ । सोही क्रममा फोटो प्रदर्शनीका साथै उत्कृष्ट लघु चलचित्र गरिमा, फातिमा, गौरव २, डोल्मा, सेता मलामी र सेनाको चेली पनि प्रदर्शन गरिएको थियो ।
