काठमाडौ । विभागिय टोली नेपाल पुलिस क्लबको अपराजित यात्रा जारी रहेको छ ।
छैठौं आर.बि.बि. – एन.भि.ए. राष्ट्रिय महिला तथा पुरुष भलिबल क्लब लिग २०७९ मा आज पनि महिला तर्फ पुलिसले जित निकाल्दै अपराजित यात्रालाई कायमै राखेको हो।
पुलिसले प्रतिभा माली बेगर खेलेको न्यू डायमण्डलाई २५–११, २५–१७, २५–१५ ले पराजित गरेका छन् भने पुलिसले आफूले खेलेको तीन खेलमा तीनै खेलमा जित हात पारेको छ । यस जीत संगै पुलिसको लिगमा ९ अंक भएको छ।
आजै भएको महिलातर्फको अर्को खेलमा अर्का विभागिय टोली एपिएफले एभरेष्ट भलिबल क्लबलाई २५–१३, २५–१०, १९–२५, २५–१९ ले पराजित गर्दै एपिएफको तीन खेलबाट ६ अंक प्राप्त गरेको छ।
राष्ट्रिय बाणिज्य बैंकको मुख्य प्रायोजन रहेको भलिबल क्लब लिगमा पुरुषतर्फ गलकोट स्पोर्टस् क्लब र हेल्प नेपालले जित निकालेका छन्।
गलकोटले ढोरपाटन स्पोर्टस् क्लबलाई ३–२ सेटमा पराजित गरेता पनि अंक बाँड्न बाध्य भएको छ। गलकोटले ढोरपाटनलाई २३–२५, २५–१५, १८–२५, २५–२२, १५–८ ले पराजित गरेको हो । गलकोटको यो जित सँगै २ अंक रहेको छ भने ढोरपाटनको १ अंक भएको छ।
आजै सम्पन्न अर्को खेलमा टिपटप हेल्प नेपाल स्पोर्टस् क्लबले पुलिस क्लबमाथि ३–० को जित निकाल्यो भने हेल्प नेपालले २५–२३, २५–२३ र २५–२० को जित निकाल्दै आफ्नो खातामा थप ३ अंक जोडेको छ।
यस सँगै हेल्प नेपालको ११ अंक भएको छ भने सेनाको १२ अंक रहेको छ। हिजो ढिला गरि शुरुवात भएको प्रतिस्पर्धात्मक खेलमा सेनाले ढोरपाटन स्पोर्टस् क्लबलाई पराजित गर्दै थप ३ अंक जोडेको थियो।
प्रकाशित मिति: बिहीबार, वैशाख २२, २०७९ १७:४४
