काठमाडौ । नेपाल स्टक एक्सचेञ्जमा नेपाल इन्भेष्टमेन्ट बैंक र मेगा बैंकको शेयर कारोबार रोक्का गरिएको छ।
ती दुई बैंकले एकापसमा गाभिने निर्णय गरेका छन्। एकापसमा गाभिने निर्णय भएकाले तत्कालका लागि शेयर कारोबार रोक्का भएको हो।
मेगा बैंकका कम्पनी सचिव तुल्सीराम पोखरेलका अनुसार यही जेठ २७ गतेको सञ्चालक समितिको ३६०औँ बैठकले मेगा बैंक र नेपाल इन्भेष्टमेन्ट बैंक एकापसमा गाभिने सम्बन्धमा समझदारीमा हस्ताक्षर भएको जानकारी दिएको हो ।
सोही निर्णयका आधारमा कारोबार रोक्काका लागि नेप्सेलाई आग्रह गरिएको हो। दुई बैंक एकापसमा गाभिएपछि सबैभन्दा ठूलो बैंक बन्नेछ।
एकापसमा गाभिएपछि बैंकको नाम नेपाल इन्भेष्टमेन्ट मेगा बैंक रहने बताइएको छ।
आगामी असोज मसान्तसम्म एकीकृत कारोबार गर्ने तयारी गरिएको छ। दुई बैंक एक आपसमा गाभिएपछि बन्ने बैंकको कूल चुक्तापूँजी ३२ अर्ब ८१ करोड हुनेछ ।
प्रकाशित मिति: सोमबार, जेठ ३०, २०७९ १४:२१
