सुनसरी । धरान उपमहानगरपालिकका प्रमुख हर्कराज राई (साम्पाङ) सहितको स्वरमा बनाइएको हाइकिङ गीत धरानमा सार्वजनिक गरिएको छ ।
सेवक अभियानले सुरु गरेको ‘स्वास्थ्यका लागि पदयात्रा’ अभियानलाई समेटेर बनाइएको गीत सार्वजनिक गरिएको हो। गीतको रचना पदयात्राका अभियन्ता राजीव हलुवाइले गरेको छ ।
उक्त गीतमा चर्चित गायक तथा गायिकाहरु राजेशपायल राई, रमना श्रेष्ठ, मेलिना राई, प्रश्ना शाक्य, डिल्ली फोम्बो, शिव लामिछाने, पम्फा चाहारसँगै धरानका प्रमुख हर्क साम्पाङले पनि स्वर दिएको छ । गीतमा मनोज मोतेले सङ्गीत भरेको छ । धरानका पाखापखेरीमा घुम्न प्रोत्साहन गर्न र पदयात्राको सम्भावना भएको क्षेत्रलाई समेटेर भिडियो बनाइएको हो ।
कार्यक्रममा धरान-८ स्थित अनुपमा प्याकेजिङ उद्योगले उत्पादन गरेको प्रिमियम सिटिसी चिया धरान पनि नगर प्रमुख र उपप्रमुखलाई हस्तान्तरण गरिएको थियो ।
हलुवाइले धरानमा पदयात्रा संस्कृतिलाई व्यापक गर्न लामो समयदेखि अभियान चलाउँदै आएको छ । स्वास्थ्यका लागि हिँडौँ भनेर उनले प्रत्येक शनिबार नयाँनयाँ ठाउँमा समूह बनाएर पदयात्रा गर्दै आएको छ ।
हलुवाइको अभियानको प्रभावले धरानमा पदयात्रामा निस्कने धरानेहरुको सङ्ख्या ठूलो छ । पदयात्राको अगुवाइ गरिएकाले यहाँ उनी ‘हाइकिङ बाबा’को नामले पनि परिचित छन्।
उनै हलवाइ ‘हाइकिङ बाबा’ले रचना गरेको हाइकिङ गीत सोमबार सार्वजनिक गरिएको हो ।
प्रकाशित मिति: मंगलबार, साउन १०, २०७९ १४:०३
