सोलुखुम्बु । थुलुङ दुधकोशी गाउँपालिका-५ जुबुमा एकै दिन तीन वटा कार्यक्रम भवनको उदघाटन गरिएको छ ।
जुबुमा लक्ष्मी बैकको शाखा रहित बैंकिङ शेवा, ग्रामीण स्वास्थ्य इकाई र वडा कार्यालयको भवन उदघाटन गरिएको हो।
वडा-४, ५ र ९ लाई लक्षित गरि सुकेपोखरीबजारमा लक्ष्मी बैंकको शाखारहित बैंकिङ सेवा सन्चालनको उदघाटन गरिएको पालिका प्रवक्ता भोजराज कार्कीले जानकारी दिए ।
कोशीपारीका नागरिकलाई सहज बैंकिङ सेवा प्रदान गर्नको लागि बैंक सङ्ग सहकार्य गरि वडा-७ र ८ लाई लक्षित गरि बुढिडाडा र जुबुमा सेवा सञ्चालन गर्न सफल भएको पालिका अध्यक्ष असिम राईले बताए ।
जिल्लामा नै बैंक मार्फत सामाजिक सुरक्षा भत्ता वितरण गरेको स्मरण गर्दै अध्यक्ष राईले जेष्ठ नागरिकलाई यातायातमा हुने खर्च र समय बचत हुने विश्वास व्यक्त गरे ।
यस्तै ग्रामीण स्वास्थ्य इकाईको भवन उद्घाटन पश्चात सेवा प्रवाहमा निकै सहज हुने इकाईका निमित्त प्रमुख ज्योति राईको भनाई छ ।
यस अघि निजि घरभाडामा लिएर स्वास्थ्य सेवा प्रबाह भैरहेको थियो । गाउँपालिकाको पहलमा करिब ३२ लाखको लागतमा रावा कन्सट्रक्सनले उक्त भनव निर्माण गरेको हो ।
गाउँपालिका र जिल्ला समन्वय समिति सोलुखुम्बुको लागत साझेदारीमा निर्मित वडा-५ को वडा भवनको पनि पालिका अध्यक्ष असिम राईले उद्घाटन गरे ।
वडा अध्यक्ष चन्द्रबहादुर राईको अध्यक्षता एवम् पालिका प्रमुख राईको प्रमुख आतिथ्यतामा उक्त वडा भवनको उदघाटन गरिएको वडा-७ का अध्यक्ष पालिका प्रवक्ता भोजराज कार्कीले जानकारी दिए ।
कार्यक्रमलाई सम्बोधन गर्दै पालिका उपप्रमुख सविता राईले वडा-५ बासीलाई बधाई ज्ञापन गर्दै आगामी दिनमा सेवा प्रबाहमा सहजता हुने विश्वास व्यक्त गरे ।
हिमालय माविको भवनबाट सेवा दिँदै आएको वडाले अबदेखि आफ्नै कार्यालयबाट प्रदान गर्दा सहजता हुने भन्दै उपप्रमुख राईले गुणस्तरीयताका साथै सहजरुपमा प्रदान गर्नको लागि कर्मचारीलाई निर्देशन दिए ।
पालिका प्रवक्ता एवम् वडा-७ का वडा अध्यक्ष भोजराज कार्कीले नागरिक सचेत नभएसम्म विकास नहुने भन्दै खवरदारी र समर्थनको भावनामा बिकास हुनुपर्ने बताए ।
पालिका प्रमुख असिम राईले स्थानीय सरकारले भौतिक पुर्वधार निमार्णदेखि जनजीविकाको सबालमा उत्तिकै काम गरिरहेको बताउँदै भौगोलिक हिसाबले जुबु र लोखिम पालिका केन्द्रदेखि बिकट रहेको विषयलाई मध्यनजर राखी काम गरिरहेको बताए ।
गाउँपालिकाको नौ वटै वडालाइ समान ढंगले विकास गर्ने अबधारणालाई आत्मासाथ गर्दै काम गरिरहेको भन्दै अध्यक्ष राईले सवैको सहभागीता बिना बिकास संभव नहुने बताए ।
एकै दिन तीन वटा कार्यक्रमको उद्घाटन गरेको स्मरण गराउदै अध्यक्ष राईले निमार्ण व्यवसायीले इमानदारीताकासाथ काम गर्नेभए विकास निर्माणमा ठूलो टेवा पुग्ने बताए ।
ठेकेदारले काम नगर्ने अनि जनप्रतिनिधिलाई गाली गर्ने काम भइरहेको भन्दै अध्यक्ष राईले काम नगर्ने ठेकेदारलाई बहिस्कारको नीति लिने बताए ।
आयोजित उदघाटन कार्यक्रम समारोहमा जग्गादातालाई सम्मान गरिएको थियो भने पहिरो पीडित परिवारलाई राहत स्वरुप १० हजार नगद हस्तान्तरण पनि गरिएको थियो ।
