काठमाडौ । ऐतिहासिक पाटन दरवारस्थित कृष्ण मन्दिर परिसरमा श्रीकृष्ण जन्माष्टमीको भव्य तयारी गरिएको छ। भाद्र कृष्ण अष्टमीका दिन सो सो मन्दिरमा दर्शनार्थी भक्तजनको भुइचो लाग्ने गर्दछ ।
मङ्गलटोल सुधार सङ्घका अध्यक्ष किरणमान प्रधानले दर्शनार्थी भक्तजनको सुबिधाका लागि तयारी भइरहेको बताउँदै उनले भने, “आज मध्यरातिदेखि नै मेला भर्न भक्तजन कृष्ण मन्दिर आउने भएकाले आवश्यक तयारीमा जुटेका हौं।” दर्शनार्थीलाई सुव्यवस्थित मेला गराइने उनले जानकारी दिए ।
महिला तथा पुरुष भक्तजनलाई छुट्टा छुट्टै लाइनमा राखिने कृष्ण मन्दिरका मूल पुजारी रुपन शर्मा राजोपाध्यायले बताए।
ललितपुरका प्रमुख जिल्ला अधिकारी घनश्याम उपाध्यायले मन्दिर परिस क्षेत्रमा आवश्यक शान्ति सुरक्षाको व्यवस्था मिलाइएको जानकारी दिए ।
गत वर्ष कोभिड महामारीका कारण सो मन्दिरमा मेला भर्न बन्द गरिएको थियो । पाटनमा उक्त मेलासँगै भीमसेन खटजात्रा, मच्छिन्द्रनाथ जात्रा एवं कार्तिक नाचसमेत मञ्चन गर्ने गरिन्छ ।
पाटन दरवार परिसरमा रहेको सो कृष्ण मन्दिर मुलुकमा शिखर शैलीमो ढुङ्गैढुङ्गाबाट निर्मित २१ गजुर भएको एक मात्रै धार्मिक तीर्थस्थल हो।
प्रकाशित मिति: बिहीबार, भदौ २, २०७९ १७:४२
