काठमाडौ । एमयुएफसी विजयचोक युथ क्लब काठमाडौंले आगामी असोज ६ गतेबाट हुने सहिद स्मारक ‘सी’ डिभिजन लिग छनौट खेल्ने भएको छ ।
सन् २०१२ मा गठन भएको एमयुएफसी बेलायती फुटबल क्लब म्यान्चेष्टर युनाइटेडका समर्थकको टोली हो ।
शुरुवाती दिनहरुमा सातामा विदाको दिन शनिवार भेला भइ एक आपसमा खेल्ने यस क्लवले विस्तारै क्लबमा सदस्यको संख्या बढ्दै गएपछि क्लब गठन गरेर विभिन्न प्रतियोगिताहरुमा उत्कृष्ट सहभागिता जनाउँदै आएको छ।
एमयुएफसी फुटबल क्लबले नैकाप गोल्डकप, शुटर्स कप लगायत विभित्र प्रतियोगितामा अनुभव बटुलेर गत वर्ष सहिद स्मारक ‘सी’ डिभिजन लिग छनोटको सुपर ८ मा पुग्न सफल भएको थियो ।
विभिन्न समुदायमा हुने विकास निर्माण, जनचेतना मुलक कार्यक्रमहरु, स्वास्थ्य शिविर, कोभिड १९ बाट प्रभावित व्यक्तिहरुलाई खाना बनाएर खुवाउने, खाद्यात्र वितरण र निशुल्क कोभिड आइसोलेसन सेन्टर सञ्चालन कार्य समेत गरेर स्थानीयलाई सहयोग गर्दै आइरहेको छ।
आगामी दिनमा सामाजिक सेवासँगै व्यवसायिक फुटबललाई पनि निरन्तरता दिनका लागि आगामी असोज ६ गतेबाट हुने ‘सी’ डिभिजन लिग छनौट खेल्न लागेको क्लबका मेनेजर सुरेश नेपालले नामीन्यूज डटकमलाई जानकारी दिएका हुन् ।
क्लबका मेनेजर नेपालका अनुसार एमयुएफसी विजयचोक युथ क्लब बीच सहकार्य गरेर दोस्रो पटक लिग फुटबल खेल्न लागेको हो ।
यसैबीच अखिल नेपाल फुटबल संघ (एन्फा)ले सहिद स्मारक ‘सी’ डिभिजन लिग छनौट खेलका लागि सार्वजनिक गरेको तालिका अनुसार असोज ६ गतेबाट उपत्यकामा सुरु हुने छनौट प्रतियोगितामा देशभरका ६० क्लब सहभागी हुने जनाएको छ।
एन्फाले सहभागी ६० क्लबलाई २० समूहमा विभाजन गरेको छ भने प्रत्येक समूहमा ३ क्लब रहेका छन् । हरेक समूहको विजेता दोस्रो चरणमा प्रवेश गर्नेछन्।
दोस्रो चरण तथा नकआउट चरणलाई ३ समूहमा विभाजन गरिएको छ । हरेक समूहका फाइनल विजेता ‘सी’ डिभिजन लिगमा छनौट हुनेछन्। यी समुहका सबै खेल कार्तिक २४ गते समापन हुनेछ ।
प्रकाशित मिति: मंगलबार, असोज ४, २०७९ ०७:२५
