काठमाडौ । गायक प्रकाश सपुत र रेश्मा घिमिरे अभिनित ‘जाने भए जाउ माया’ बोलको म्युजिक भिडियो सार्वजनिक भएको छ ।
भावनात्मक यस गीतमा स्वर गायक सरन गुरुङको रहेको छ भने गीतमा शब्द, सङ्गीत विकास ल्वागुनको रहेको छ। गीतलाई कोविद बज्रले सङ्गीत संयोजन गरेको हो ।
सहना इन्टरटेन्मेन्टको प्रस्तुति रहेको ‘‘जाने भए जाउ माया’ म्युजिक भिडियो गायक गुरुङको रिलिजको तयारीमा रहेको एल्बम ‘सहना’ मा सङ्ग्रहित गीत हो ।
एलबम नोभेम्बर १३ मा विमोचन हुने गायक गुरुङले बताए । एलबम रिदम स्क्रीन क्रिएसन र वि द बेस्टको सहयोगमा तयार पारिएको हो। म्युजिक भिडियोमा प्रकाश सपुत र रेश्मा घिमिरेले श्रीमान् र श्रीमतीको भूमिकामा अभिनय गरेको छ।
म्युजिक भिडियोमा ‘जाने भए जाउ माया फर्की नआऊ माया’, ‘भन्थ्यौ तिमी म संसार थिएँ, सुख र दुःखमा ज्यानै दिन्थेँ’, ‘हात छोड्यौँ साथ छोड्यौ, सँगसँगै हिँडेको बाटै मोड्यौ’, ‘माया छोडी गएपछि दिल तोडी गएपछि’ लगायत बोलका गीत समावेश गरिएको छ ।
बुद्ध थापाले छायाङ्कन गरेको ‘जाने भए जाउ माया’ भिडियोलाई विकास धमलाले सम्पादन गरेको छ भने निकेश खड्काको निर्देशनमा भिडियो तयार पारिएको हो ।
‘जाने भए जाउ माया’ भिडियोलाई गायक गुरुङको च्यानल ‘सरन गुरुङ’ मार्फत् सार्वजनिक भएको हो । हाल अमेरिकामा बस्दै आएका गायक गुरुङले आफ्नो नयाँ म्युजिक भिडियोलाई हेरेर सुनेर प्रतिक्रिया दिन आग्रह गरेको छ ।
प्रकाशित मिति: शुक्रबार, असोज २८, २०७९ १९:४४
