काठमाडौ । भौतिक जीवनमा धर्म अथवा आध्यात्मिक मार्ग अपरिहार्य छ । धर्म र संस्कृति विना मानवीय जीवन अपुरो रहन्छ । भौतिक जीवन र आध्यात्मिक मार्ग एक अर्काका परिपूरक हुन् ।
त्यसैले नेपाली गीतसंगीत क्षेत्रमा पनि विभिन्न धार्मिक तथा आध्यात्मिक मार्गका गीतसंगीतले ठूलो महत्व राख्दछ। जसलाई गीतसंगीतमार्फत भक्तिभावपूर्ण रुपमा भगुवानलाई पुकारिन्छ अथवा प्रार्थना गरिन्छ ।
भगुवानको शक्ति प्राप्त गर्न भक्ति, योग, ध्यान, साधना र तपस्या गरिन्छ । शक्ति प्राप्त गर्ने यी विभिन्न मार्गहरु मध्ये भक्तिधारामा आधारित अति मीठो स्वरकी धनी इन्दिरा भट्टराईको आवाजमा ज्यादै मीठो भजन “लक्ष्मी भजन: ॐ महालक्ष्मी नमो नम:” नामक भजनभिडियो सार्बजनिक भएको छ।
अत्यन्तै भक्तिभावपूर्ण मनमोहनी कलाकारितामा प्रस्तुत महालक्ष्मी मन्त्र सहितको यस “लक्ष्मी भजन: ॐ महालक्ष्मी नमो नम:” भजनभिडियोको कलाकारहरुमा ग्रेशियन सापकोटा, गणेश सापकोटा, सपना गिरी र सरिता बस्नेत रहेका छन्।
हर्ट अफ हिमालय म्युजिक एण्ड ट्रेजरको प्रस्तुतिमा निर्माण गरिएको यस “लक्ष्मी भजन: ॐ महालक्ष्मी नमो नम:” भजनभिडियोमा शब्द संगीत सागर अधिकारीको रहेको छ भने निर्देशन तथा सम्पादन कमल फूँयालले गरेका हुन् । त्यस्तैगरी एरेञ्जमा विनोद श्रीपाल, रेकर्डिङ/मिक्सिङ र माष्टरिङमा कुमार केसी रहेको छ भने छायाङकन आर्यन विमलीको रहेको छ।
“गीतसंगीत क्षेत्रमा बढ्ता उच्छृङ्खलता र धर्म (धार्मिक) संस्कृतिप्रति नैराश्यता आएको छ”, गायिका इन्दिरा भट्टराईले भनिन्, “नेपाली समाजले पनि त्यही उच्छृङ्खलतापनलाई बढी प्राथमिकता दिँदै जान थालेकाले धार्मिक गीतसंगीतप्रति ह्रास आउन थालेको छ । यस्ता धार्मिक गीतसंगीतप्रति हुने गरेको विखण्डन र विसंगतिको प्रहारलाई चिर्दै यो “लक्ष्मी भजन: ॐ महालक्ष्मी नमो नम:” भजनभिडियो बजारमा ल्याउन आफू सफल भएको हो ।”
"लेकबेँसीका सुसेलीले", गीतबाट गीतसंगीतमा ख्याती प्राप्त गायिका भट्टराईले "सिंहदरवार झ्यालैमा ऐना", ‘न्यूरोडमा एक्सिडेन्ट", ‘काठमाडौंको माइक्रो बसैमा", ‘चेलीको व्यथा, ‘मायाको घर‘, तिमी विना" र ७ वटा देउडा भाका गीत लगायत दर्जनौं मार्मिक गीतहरु गाइसकेकी छन् ।
सुरिली स्वरकी धनी गायिका भट्टराईकाे यसअघि "दुर्गा भजन: जय अम्बे जय जगदम्बे", जय पशुपतिनाथ" र "हे ! गणनायक" जस्ता सुपरहिट भजनमालाका भिडियाेहरु सर्वत्र बजारमा आइसकेका छन् ।
अब आगामी दिनहरुमा क्रमश विभिन्न भक्तिदर्शनका भजनमालाहरु दुनियाँका दर्शक तथा स्राेताहरुमाझ निरन्तर पस्कँदै जाने प्रतिबद्धता समेत व्यक्त गरेकी छन् गायिका भट्टराईले।
प्रकाशित मिति: शनिबार, कात्तिक ५, २०७९ ०९:४५
