धनुषाधाम । धनुषाबाट प्रतिनिधि सभा सदस्यमा एमालेबाट श्रीमान-श्रीमतीले नै प्रत्यक्षतर्फ चुनाव जितेका छन् ।
धनुषाका चार प्रतिनिधि सभा क्षेत्रमध्ये दुई क्षेत्र धनुषा निर्वाचन क्षेत्र-३ बाट जुलीकुमारी महतो र धनुषा-४ बाट रघुवीर महासेठ निर्वाचित भएको हो।
प्रतिनिधि सभा सदस्यमा निर्वाचित महासेठ र महतो श्रीमान-श्रीमती हुन् । यसअघि पनि दुवैजना सांसद थिए । यसपटक भने प्रत्यक्ष निर्वाचित दुबैजना रघुवीर र जुलीले सत्ता गठबन्धनका उम्मेदवारलाई हराउँदै विजयी भएका छन्।
२०७४ मा महासेठ प्रत्यक्षबाट र जुली समानुपातिक कोटाबाट सांसद बनेका थिए । उनीहरु दुवैजना पालैपालो केपी शर्मा ओली नेतृत्वको सरकारमा मन्त्री पनि भएका थिए ।
त्यस्तैगरी प्रतिनिधि सभा सदस्यमा थप दुई जोडी पनि आउने निश्चित भएको छ । कांग्रेस सभापति शेरबहादुर देउवा र उनकी पत्नी आरजु राणा तथा जसपा नेता अशोक राई र उनकी श्रीमती सुशीला श्रेष्ठ संसदमा देखिनेछन् ।
डडेलधुराबाट प्रत्यक्षतर्फ निर्वाचित प्रधानमन्त्री शेरबहादुर देउवा छन् भने उनकी श्रीमती आरजु राणा कांग्रेसको समानुपातिक तर्फको सूचीमा पहिलो नम्बरमा छिन् ।
प्रत्यक्ष निर्वाचिततर्फ पुरुषहरु नै धेरै भएका कारण समानुपातिकमा महिलाहरु बढी आउने छन् । यसमा पहिलो नम्बरमा रहेकी आरजु देउवा आउने पक्का छ ।
यस्तैगरी, सुनसरी १ बाट प्रत्यक्षतर्फ निर्वाचित जनता समाजवादी पार्टी (जसपा)का अशोक राई रसुशीला श्रेष्ठको नाम समानुपातिकमा रहेकाे छ ।
जनता समाजबादी पार्टी (जसपा) मा पनि पुरुषहरु धेरै निर्वाचित भएका कारण श्रेष्ठ समानुपातिकतर्फबाट निर्वाचित हुने निश्चित नै देखिन्छ ।
प्रकाशित मिति: मंगलबार, मंसिर १३, २०७९ १३:१५
