काठमाडौ । नेपाल सङ्गीत तथा नाट्य प्रज्ञा प्रतिष्ठानको आयोजनामा ‘मुकुण्डो नृत्य प्रस्तुति–२०७९’ प्रज्ञा प्रतिष्ठान प्राङ्गणमा सम्पन्न भएको छ ।
नेपाल सङ्गीत तथा नाट्य प्रज्ञा प्रतिष्ठानको नृत्य विभागको पहलमा आयोजना भएको मुकुण्डो नृत्य प्रस्तुति कार्यक्रममा सभाध्यक्ष प्रज्ञा प्रतिष्ठानका कुलपति नारायणभक्त श्रेष्ठ रायन तथा प्रमुख आतिथि नृत्य क्षेत्रका हस्ती वरिष्ठ नृत्यकार, नेपाली पहिलो नृत्य निर्देशक तथा नृत्य अनुसन्धानकर्ता भैरव वहादुर थापाको उपस्थिति थियो ।
व्यानर वाचन गरेर उद्घाटन गरिएको ‘मुकुण्डो नृत्य प्रस्तुति–२०७९’ कार्यक्रम समारोहमा मुकुण्डो नृत्य सम्बन्धी दुई वटा कार्य पत्र प्रस्तुत गरिएको थियो ।
पुरुषोत्तम लोचन श्रेष्ठले ‘नेपाल मण्डलका परम्परित मुकुण्डो नाच ः विगत र वर्तमान’ शीर्षकमा कार्यपत्र प्रस्तुत गरेको थियो भने वरिष्ठ संस्कृतिकर्मी गणेशराम लाछीले ‘नेपालको अमूर्त सम्पदा मुकुण्डो नृत्य आजको अवस्था’ शीर्षकमा तयार पारेको आलेख वाचन गरेको थियो।
कार्यक्रममा काठमाडौं उपत्यकामा प्रचलित चार प्रकारका मुकुण्डो नृत्य प्रस्तुत गरिएको थियो । काठमाडौं हाँडीगाऊँबाट नर नेवा मंकाखलःले लाखे नृत्य प्रस्तुत गरेको थियो । जसमा २१ जना कलाकारहरुले आफ्नो प्रस्तुति दिएका थिए ।
यसैगरी भक्तपुरबाट मुक्ति सङ्गीत प्रशिक्षण केन्द्रले महाकाली नृत्य प्रस्तुत गरेको थियो जसमा २२ जना कलाकारहरुले परम्परागत भेषभूषा सहितको महाकाली नृत्य प्रस्तुत गरेका थिए ।
भक्तपुरबाट विनायक स्कूलले नृत्य कलाकार तथा वाद्यवादक सहित १७ जना कलाकारहरु सम्मिलित अष्टमातृका नृत्य प्रस्तुत गरेका थिए भने काठमाडौंको पिस कल्चर ग्रुपका २ जना कलाकारले भैरव काली नृत्य प्रस्तुत गरेका थिए ।
कार्यक्रमलाई सम्बोधन गर्दै नेपाल प्रज्ञा प्रतिष्ठानका कार्यवाहक कुलपति जगमान गुरुङले मुकुण्डो माटो वा धातुबाट मात्र नभई बाँसबाट बन्ने नाङ्लोमा आकृति बनाएर पनि निर्माण गर्ने गरिएको इतिहास रहेको बताएका थिए । लाखे राक्षस भएको तान्त्रिकहरुले वसमा पारेर नचाइने भएकाले तान्त्रिक नृत्य पनि भएको बताएका थिए ।
कार्यक्रमलाई सम्बोधन गर्दै प्रमुख अतिथि वरिष्ठ नृत्य निर्देशक भैरवबहादुर थापाले भाषाको उत्पत्ति जत्तिकै लामो रहेको बताएका थिए भने सभाध्यक्ष कुलपति नारायणभक्त श्रेष्ठले नेपाली मौलिक कलाहरुको संरक्षण र प्रवद्र्धनमा प्रज्ञा प्रतिष्ठान लागि परेको बताएका थिए ।
कार्य पत्र प्रस्तोता तथा कलाकारहरुलाई सभाध्यक्ष एवम् प्रमुख अतिथिद्वारा कदर पत्र र प्रमाण पत्र प्रदान गरेर सम्मान गरिएको थियो ।
नृत्य विभाग प्रमुख नमुना शर्माले संयोजन गरेको कार्यक्रमा उनले नै सहजीकरण गरेको थियो भने कार्यक्रममा नेपाल प्रज्ञा प्रतिष्ठान, ललितकला प्रज्ञा प्रतिष्ठान र सङ्गीत नाट्य प्रज्ञा प्रतिष्ठानका पदाधिकारी, वरिष्ठ नृत्यकर्मी, नाट्यकर्मी, सङ्गीतकर्मीहरुको उल्लेखित उपस्थिति रहेको थियो ।
प्रकाशित मिति: बुधबार, मंसिर २१, २०७९ १८:१४
