परिवार जहाजमा उड्ने र गाडीमा गुड्ने सबै नागरिकका हुन्छन्, शोकको डिग्रीलाई उड्नु र गुड्नुले फरक पार्दैन । हवाई यात्रा सबै यातायातका साधनमा सबैभन्दा सुरक्षित मानिने यात्रा हो । तर, नेपालको हकमा यो पनि अपवाद हुँदै गएको छ ।
नेपालको आकाशमा उड्ने आन्तरिक हवाई उडान सुरक्षित हुन सकेको छैन् । पटक पटक नेपालको आन्तरिक उडानमा नेपालको आकाशमा दूर्घटना भएर कयौंको ज्यान गैसकेको छ ।
काठमाडौंवाट पोखराको उडानमा गएको यति एअरलाइन्सको जहाज पोखराको सेती नदीको खोचमा पुगेर गंभीर दूर्घटना भएर ७२ जनाको ज्यान जानु नेपालको हवाई इतिहासमा गंभीर तथा ठूलो दूर्घटना हो ।
विश्वमा हवाई यात्रा सुरक्षित यात्राको रुपमा लिएतापनि नेपालको परिप्रेक्ष्यमा हवाई यात्रा त्यति सुरक्षित नहुनुको कारणमा यसमा गरिने गरेको बारम्बार लापरवाही नै कारक हुने गरेको छ ।
विदेशमा निकम्मा भनिएका हवाइजहाजहरु नै सस्तोको भाउमा नेपालमा ल्याउने अनि तिनवाट नै उडान भर्ने गरेवाट यस्ता दर्दनाक घटनाको शिकार नेपाल र नेपाली हुनु परिरहेको छ ।
जुन परिदृ्श्यमा नेपालको दुर्घटनाको इतिहास हेर्ने हो भने धेरै दुर्घटना हुने एयरलाइन्स मध्येको एक यति एयरलाइनसको विमान पुनः दुर्घटनामा परेवाट सवैलाई झस्काएको छ ।
दुर्घटनामा परेको यति एयरलाइन्सको सो जहाज १५ वर्षअघि उत्पादन भएको पाइएको छ । दुर्घटनामा परेको जहाज एटिआर कम्पनीले उत्पादन गरेको सिरियल नम्बर ७५४ जहाज हो ।
सन् २००७ मा पहिलो उडान गरेको सो जहाज यतिले सन् २०१९ मार्च २६ मा किनेको थियो । थाइल्याण्डको नोक एयरले यो एटीआर किङफिसरलाई बेचेको थियो । भारतको किङफिसर एयरलाइन्सले प्रयोग गरेको यो जहाज सन् २०१३ बाट नुक एयरले प्रयोग गरेको थियो।
१६ बर्ष पुरानो जहाज नेपालको आकाशमा उडानमा रहेको यो तथ्यले पनि दूर्घटना हुनुको कारणमा इञ्जिनमा आएको खराबी हो या अरु नै कारण हो भन्ने कुरा अनुसन्धान पछि नै थाहा हुने कुरा हो । यद्यपि, कवाडमा पठाउनु पर्ने हवाइजहाजहरु नेपालको आकाशमा उडान भरिरहेको अवस्थालाई नजर अन्दाज गर्ने हो भने, यसले अझ धेरै दूर्घटना निम्त्याउने देखिन्छ ।
तसर्थ, दूर्घटना न्यून गर्न सवैभन्दा पहिला संवन्धित निकायले पुराना थोत्रा जहाजलाई कवाडमा फाल्न र फाल्न लगाउन अत्यन्त आवश्यक छ । नयाँ र ब्राण्डेट जहाज मात्र ल्याउने र तिनलाई मात्र नेपालको आकाशमा उडान भर्न लगाउने कडा नियम बनाउन आवश्यक छ ।
- नामी साप्ताहिक
प्रकाशित मिति: आइतबार, माघ ८, २०७९ १९:५६
