लण्डन (युके) मा कुकिङ्मा स्नातक गरेर संगीतप्रतिको आफ्नो लगावका कारण आफूलाई गीतसंगीतमा सपर्पित गरेका सौगात लिम्बू सानै उमेरदेखि गीतसंगीतमा रुचि राख्थे ।
मेटानोया रेकर्ड्स नामक कम्पनीमार्फत आफ्नो सांगीतिक खुराक पस्कने सौगातको (आरएनवी) विश्वमै एकदमै नयाँ ढंगको सांगीतिक प्रस्तुतिले उनको सांगीतिक ग्रुप जेएवमार्फत युट्युव क्रियटर अवार्डस् पनि प्राप्त गरिसकेको छ भने उनको साथी जे अथर र उनको “टाइम छैन” बोलको गीतले नेपालमा समेत ठूलै लोकप्रियता हासिल गरिसकेको छ।
हाल लण्डनमा प्रशासनिक कार्य गर्दै बाँकी समय संगीतमा खर्चँदै आएका सानै उमेरदेखि अत्यन्त इमान्दार, स्पष्टवक्ता र आफ्नो कामप्रति उत्तरदायि अनि जवाफदेही हुने बानीका कारण सथीभाइ लगाएत सबैका असाध्यै प्रिय व्यक्तिका रुपमा चिनिने सौगात लिम्बूसँग उहाँ नेपाल आएको अवसर पारेर लिइएको अन्तर्वार्ताको सार संक्षेप यहाँ प्रस्तुत छ ।
सांगीतिक क्षेत्रमा तपाईँ लाग्नुको मुख्य उद्देश्य के हो ?
शुरुमा साथीभाइहरुसँग रमाइलोको लागि संगीत क्षेत्रमा लागेँ पछि यो क्षेत्रमा लाग्दै जाँदा र यो क्षेत्रलाई बुझ्दै जाँदा मेरो यस क्षेत्रमा रस बस्यो ।
कस्को प्रेरणाले यो क्षेत्रमा लाग्नु भयो ?
मलाई सानै उमेरदेखि संगीतमा लगाव थियो । त्यसमाथि संगीतप्रति चाख राख्ने साथीभाइहरुको संगतका कारण संगीतकै बारेमा धेरै कुराकानी हुन्थ्यो । यिनै कारणहरुले मलाई संगीतले तान्यो । अनि फेरी म सांगीतिक क्षेत्रमा युवाहरुलाई आकर्षित गर्न पनि लालायित भएकोले मलाई यो क्षेत्रमा लाग्न झन प्रेरणा मिल्यो ।
तपाईँलाई नेपालमा सबैभन्दा मनपर्ने सांगीतिक गु्रप कुन हो ? र गायक को हो ?
आस्था ब्याण्ड र नेप्साइडेज् गु्रपबाट मलाई प्रभाव पर्यो । अहिलेको पुस्तामा मलाई मन पर्ने गायक चाहिँ एड्रेन प्रधान हो भने पुरानो गायकमा मलाई मनपर्ने गायक चाहिँ नवीन के भट्टराई हो ।
तपाईँलाई कस्ता गीत बढी मन पर्छ ?
म विदेशमा हुर्किएको र बढेकोले मलाई पप गीत, आरएनवी र र्याप गीतहरु नै धेरै मनपर्छ।
नेपालमा आरएनवी टाइपको गीतसंगीतहरु लोकप्रिय नहुनुको कारण के देख्नुहुन्छ ?
नेपालमा आरएनवी टाइपको गीत गाउने गायकहरु धेरै छैनन् त्यसैले यहाँ यस्तो गीतहरु लोकप्रिय नभएको हो । पछि नेपाली गायकहरुले आरएनवी टाइपको गीतहरु गाए भने नेपालमा पनि यस्तो गीतहरु लोकप्रिय हुन्छन् ।
आरएनवी टाइपको गीत र पप गीतमा के फरक छ ?
आरएनवी लण्डन, अमेरिका लगायत विकसित देशहरुमा सडकबाट जन्मिएको गीत हो । पप गीत व्यवसायिक हुन्छ। पप गीतले प्रेमको कुरा धेरै गर्छ। आरएनवी सडकको गीतसंगीत हो । यसले चाहिँ युवतीसँग जिस्किने र पार्टी गर्ने टाइपको शब्दहरुलाई महत्व दिएको हुन्छ।
तपाइँलाई नेपालमा आएर गीतसंगीतमा लाग्ने इच्छा छैन ?
मलाई नेपालमा आएर गीतसंगीतको सिर्जना गर्ने मन छ । यहाँ आरएनवी टाइपको गीतसंगीतलाई राम्रोसँग प्रचार गर्न सक्यो भने स्थापित र सफल पनि भइन्छ । विदेशमा पाइने सांगीतिक ज्ञान र अनुभव अझ राम्रोसँग बटुलेर पछि नेपाल आउने विचार छ मेरो।
- नामी साप्ताहिक
