काठमाडौ । आइसीसी विश्वकप क्रिकेट लिग-२ मा नेपालले पपुवा न्युगिनीलाई ३ विकेटले पराजित गरेको छ ।
पपुवा न्युगिनीले जितका लागि दिएको १ सय ८० रनको लक्ष्य नेपालले ४८ ओभरमा सात विकेट गुमाउँदै पूरा गरेको हो ।
नेपालको जितमा आसिफ शेखले सर्वाधिक अविजित ८६ रनको योगदान दिए भने उनले एक सय ३० बलमा २ चौका र १ छक्काको मद्दतमा उक्त रन बनाए । त्यसैगरी सन्दीप लामिछानेले अविजित ३५ रन बनाए ।
कुशल मल्लले २६ बलमा २३ रन बनाए । पहिलो बलमा नै ओपनर कुशल भुर्तेललाई गुमाएको नेपालले ज्ञानेन्द्र मल्ललाई छ रनमा गुमाए ।
त्यस्तै भीम सार्कीले ८ रन मात्र बनाउँदा कप्तान रोहित पौडेल र आरिफ शेखले समान १ र १ रन बनाए । दीपेन्द्रसिंह ऐरीले ८ रन बनाए भने कुशल मल्लले २३ रनमा बनाए ।
एक छेउबाट शीर्ष ब्याटरहरू एकपछि अर्को आउट हुँदै गर्दा आसिफ शेखलाई बलर सन्दीपले भरपर्दो साथ दिए । यो जोडीले ३२ ओभरमा ७ विकेटको क्षतिमा १०७ रनको अवस्थाबाट नेपाललाई विजयी बनाएको हो भने आसिफ र सन्दीपले १६ ओभरमा महत्त्वपूर्ण ७७ रन जोडे।
पपुवा न्युगिनीका कप्तान असाद भाला, सेमो कमिया र सेसे बाउले समान २र२ विकेट लिए । त्यसअघि दुबई अन्तर्राष्ट्रिय क्रिकेट स्टेडियममा टस जितेर पहिले ब्याटिङ रोजेको पपुवा न्युगिनीले ४९ दशमलव २ ओभरमा सबै विकेट गुमाउँदै १७९ रनको योगफल बनाएको थियो ।
पपुवा न्युगिनीका लागि टोनी उराले सर्वाधिक ३९ रनको योगदान दिए । त्यस्तै हिरी हिरी २९ रनमा आउट हुँदा किप्लीन डोरीगाले २६ रन बनाए । गौडी टोकाले १५ रन बनाए भने नर्मन भानुवाले १४ रन बनाए । सेसे बाउ र कप्तान असद भालाले समान ११/११ बनाए ।
नेपालका लागि सोमपाल कामी र दीपेन्द्रसिंह ऐरीले समान २र२ विकेट लिए भने कुशल मल्ल, सन्दीप लामिछाने र करण केसीले समान १र१ विकेट झारे ।
यस जितसँगै नेपाल ३१ खेलमा १४ मा जित र १५ मा हारसहित छैटौँ स्थानमा छ । पपुवा न्यूगिनी ३१ खेलमा ७ अङ्कसहित तालिकाको पुछारमा रहेको छ ।
प्रकाशित मिति: शुक्रबार, फागुन १९, २०७९ २०:१५
