काठमाडौं । वरिष्ठ हास्यअभिनेता हरिवंश आचार्यको शब्द, संगीत र स्वर रहेको नयाँ गीत सार्वजनिक भएको छ ।
लोकलयमा आधारित ‘काउली’ बोलको उक्त गीतमा लोक गायिका शान्तिश्री परियारले उनलाई साथ दिएकी छिन् ।गीतको भिडियोमा समेत आचार्य स्वयंले अभिनय गरेका छन् । भिडियोमा उनीसँगै पहिलो पटक प्रकाश सपुत र प्रियंका कार्कीले एकसाथ जोडी बाँधेका छन् ।
गीतको भिडियोमा चेलबेटी बेचबिखनको सन्देश समेत दिन खोजिएको छ । गीतको भिडियो निर्देशन सरोज ओलीले गरेका छन्। हरिवंशका अनुसार उनले यो गीत निर्देशक ओलीकै एनिभर्सरीका दिन लेखेका हुन् ।
‘एक वर्षअघि म सरोज भाईको एनिभर्सरीको पारिवारिक जमघटमा सहभागी हुन होटल तिब्बेतमा गएको थिएँ,’ हरिवंशले सम्झिए, ‘त्यही बेला एक्कासी काउलीको प्रसंङग निस्कियो । मेरो मुखमा त्यसै ‘ए काउली, नचिने मान्छे आँखा झिम्काउली’ शब्द फुर्याे । त्यसपछि यसले गीतको स्वरुप पाएको हो ।’
गीत पारिवारिक र सांस्कृतिक कार्यक्रमतिर नाच्न मिल्ने बनेको बताउँछन् आचार्य । ‘बिहे ब्रतबन्धतिर उफ्रि-उफ्रि नाच्न मिल्ने गीत बनेको छ, रमाइलो लाग्यो भने दर्शकहरु पनि उफ्रि-उफ्रि नाच्न सक्नुहुनेछ,’ उनले भने ।
यस गीतको एरेञ्ज श्यामश्वेत रसाईलीले गरेका हुन् भने भिडियो कोरियोग्राफी गम्भिर विष्टले गरेका छन्।
प्रकाशित मिति: शुक्रबार, चैत ३, २०७९ २०:३८
