काठमाडौ । नेपालका सुमन कुलुङ्गले शैलुङ्ग अन्तर्राष्ट्रिय अल्ट्रा म्याराथन २०७९ को उपाधी जितेका छन् ।
५५ किलोमिटरको दुरी ५ घन्टा २६ मिनट ५८ सेकेण्डमा पुरा गर्दै पुरुषतर्फ कुलुङ्ग ७ घण्टा २ मिनट ५६ सेकेण्डकासाथ महिलातर्फ अनिता राईले उपाधी जितेका हुन् ।
विजयी भएबापत कुलुङ्ग र राईले नगद ७५ हजार सहित मेडल, ट्रफी र प्रमाणपत्र प्राप्त गरेका छन् ।
राष्ट्रिय खेलकुद परिषदको आयोजनामा भएको अल्ट्रा म्याराथनको पुरुषतर्फ दोश्रो स्थानमा बेद बहादुर सुनार रहे । उनले उक्त दुरी ५ घण्टा २९ मिनट ४० सेकेण्डमा पूरा गरेका हुन्। सुनारले नगद ४० हजार सहित मेडल, ट्रफी र प्रमाण पत्र प्राप्त गरे ।
यस्तै ५ घण्टा ४४ मिनट २२ सेकेण्ड समयका साथ दुर्गाराज बुढा तेश्रो स्थानमा रहे । बुढाले नगद १५ हजार सहित मेडल, ट्रफी र प्रमाण पत्र प्राप्त गरेका छन्।
बागमती प्रदेश खेलकुद विकास समितिको विशेष सहयोगमा आयोजित अल्ट्रा म्याराथनको महिलातर्फ ७ घण्टा ३७ मिनट २२ सेकेण्ड समयमा साथ मञ्जु रावत द्वितीय र ७ घण्टा ४४ मिनट ५८ सेकेण्ड समयका साथ रसिला तामाङ तृतीय भए ।
रावतले नगद ४० हजार र रसिलाले नगद १५ हजारका साथ मेडल, ट्रफी र प्रमाण पत्र प्राप्त गरेका छन् । ५५ कि.मि. को अल्ट्रा म्याराथनको पुरुषतर्फ अमेरिका, युकेका ४ विदेशी सहित २२ जना र महिलातर्फ ५ जनाको सहभागिता रहेको थियो ।
सुनापती गाउँपालिका, दोरम्बा शैलुङ्ग गाउँपालिका र खाँडादेवी गाउँपालिकाको सह-आयोजनामा भएको प्रतियोगिताको २५ कि.मि.को पुरुषतर्फ मोहनदेव जोशी ३ घण्टा ८ मिनट ३९ सेकेण्ड समयका साथ पहिलो, ३ घण्टा १० मिनट १० सेकेण्ड समयका साथ देवराज महतारा दोश्रो र ३ घण्टा १४ मिनट १५ सेकेण्डका साथ होमलाल श्रेष्ठ तेश्रो भए ।
यस्तै महिलातर्फ ४ घण्टा १९ मिनट ५४ सेकेण्ड समयका साथ नितु तामाङ पहिलो, ४ घण्टा २२ मिनट ४८ सेकेण्डका साथ राज्यलक्ष्मी रावल दोश्रो र ४ घण्टा ५५ मिनट ३६ सेकेण्ड समयका साथ स्विडेनकी लिन्या गोल्सेटर ९ीष्ललभब न्यकिबभतचबच० तेश्रो भईन् ।
विजयी खेलाडीहरुले क्रमश ३५, २० र १० हजार नगद सहित मेडल, ट्रफी र प्रमाण पत्र प्राप्त गरे । यस विधामा पुरुषतर्फ न्युजिल्याण्डका १ खेलाडीका साथै ६१ जना र महिलातर्फ स्विडेनकी १ खेलाडीका साथ २१ जनाको सहभागिता रहेको थियो।
रामेछाप जिल्ला खेलकुद विकास समितिको संयोजना र सुनापती शैलुङ्ग अल्ट्र म्याराथन आयोजना तथा ब्यवस्थापन समितिको ब्यवस्थापनमा भएको प्रतियोगिताको ५ कि.मि. तर्फको स्पर्धामा पुरुषतर्फ मिङ्गामार सिंगी तामाङ्ग र महिलातर्फ हुमी बुढा मगर जित हात पारे ।
मिङ्गामार २८ मिनट ३३ सेकेन्ड र हुमीले ३८ मिनट ३ सेकेण्डका साथ दुरी पूरा गर्दै पहिलो स्थान प्राप्त गरेका थिए । पुरुषतर्फ २८ मिनट ५८ सेकेन्डका साथ प्रताप खड्का दोश्रो र ३० मिनट ५६ सेकेण्डका साथ टंक कार्की तेश्रो भए ।
महिलातर्फ ४४ मिनट २५ सेकेण्ड समयका साथ अनुषा तामाङ दोश्रो र ४५ मिनट ५५ सेकेण्ड समयका साथ लक्ष्मी श्रेष्ठ तेश्रो भए ।
विजयी खेलाडीहरुले क्रमशः २० हजार, १० हजार र ५ हजार नगदका साथ मेडल, ट्रफी र प्रमाण पत्र प्राप्त गरे । ५ कि.मि.कातर्फ ५६ पुरुष र २६ महिलाको सहभागिता रहेको थियो ।
प्रतियोगिताको उद्घाटन संघिय सांसद पुर्णबहादुर तामाङ (कान्छा राम) र राष्ट्रिय खेलकुद परिषद्का सदस्य सचिव टंकलाल घिसिङले संयुक्त रिवन काटेर उद्घाटन गरेका थिए ।
रामेछाप जिल्लाको सुनापती ३, हिलेदेवीबाट सुरु भएको म्याराथन सुनापती गाउँपालिकाको विभिन्न स्थान हुँदै रामेछापको चर्चित देवस्थल खाँडादेवी मन्दिर, खाँडादेवी गाउँपालिकाको विभिन्न स्थान र दोरम्बा शैलुङ्ग गाउँपालिकाको विभिन्न स्थान हुँदै करिव ३२ सय मिटरको उचाईमा रहेको शैलुङ्गमा पुगेर समाप्त भएको थियो ।
विजयी खेलाडीहरुलाई रामेछाप जिल्लाका संघीय सांसद पूर्णबहादुर तामाङ (कान्छा राम), बागमती प्रदेशका सांसद युवराज चौलागाई, राष्ट्रिय खेलकुद परिषद्का सदस्य सचिव टंकलाल घिसिङ सुनापती गाँउपालिकाका प्रमुख ठुलो कान्छा तामाङ, दोरम्बा शैलुङ्ग गाउँपालिकाका प्रमुख मैनबहादुर मोक्तान, खाँडादेवी गाउँपालिकाका प्रमुख ज्ञानकुमार श्रेष्ठ, रामेछाप जिल्ला समन्वय समितिकी प्रमुख चिनादेवी खड्का कार्की, अन्तर्राष्ट्रिय अल्ट्रा म्याराथन धावक मिरा राई लगायतले पुरस्कार वितरण गरेका थिए ।
