कास्की । गण्डकी प्रदेशस्तरीय राष्ट्रपति रनिङ शिल्ड प्रतियोगिता आजदेखि पोखरामा सुरु भएको छ ।
‘राष्ट्रिय गरिमा र सामाजिक रुपान्तरणका लागि खेलकुद’को नारा सहित पोखरा रङ्गशालामा सञ्चालन भएको प्रतियोगितामा प्रदेशका ११ जिल्ला मध्येमा मुस्ताङ बाहेकका सबै जिल्लाको सहभागिता छ ।
खेलकुदको समुचित विकास र विस्तारका लागि मूल आधारमा रुपमा रहेका विद्यालयहरुलाई केन्द्रविन्दु बनाई खेलकुद प्रतिभाको खोजी गर्दै राष्ट्र निर्माण एवं विकासमा खेलाडीको भूमिकालाई सबल, समक्ष र प्रभावकारी बनाउने उद्धेश्यले वर्षेनी राष्ट्रपनि रनिङ शिल्ड सञ्चालन हुने गरेको छ ।
गण्डकी प्रदेशस्तरी राष्ट्रपति रनिङ शिल्ड प्रतियोगिताको गण्डकी प्रदेशका सभामुख कृष्णप्रसाद धितालले उद्घाटन गरे । प्रदेश खेलकुद परिषद्को आयोजनामा प्रतियोगिता सञ्चालन भएको हो ।
उद्घाटन समारोहमा प्रतियोगितामा सहभागी भएका १० वटै जिल्लाका खेलाडीहरुले मार्चपास गरेका थिए । प्रतियोगितामा छ खेलका ७२० खेलाडी सहभागी छन् ।
विद्यालयस्तरिय छात्ररछात्रा राष्ट्रपति रनिङ शिल्डमा मार्शल आर्टतर्फ उशु, तेक्वान्दो र कराते, टिम गेमतर्फ एथलेटिक्स, भलिबल र कवड्डीका खेलहरु सञ्चालन हुनेछन् ।
पोखरा रङ्गशालामा दुई दिनसम्म सञ्चालन हुने प्रतियोगिताबाट छनोट हुने खेलाडीले यही वैशाख बैशाख १५ र १६ गते काठमाडौँमा सञ्चालन हुने १३ औं राष्ट्रिय राष्ट्रपति कपमा सहभागिता जनाउने परिषद्का उपाध्यक्ष ध्वजकुमार गुरुङले जानकारी दिए ।
प्रदेशस्तरीय प्रतियोगितबाट छनोट हुन सफल खेलाडीहरुलाई एक दिने बन्द प्रशिक्षणमा राखिने परिषद्ले जनाएको छ। स्थानीय, प्रदेश र संघस्तरीय राष्ट्रपति रनिङ शिल्ड प्रतियोगिताले उत्कृष्ट अनुशासित र सक्षम देशका लागि आवश्यक राष्ट्रिय तथा अन्तर्राष्ट्रियस्तरका खेलाडी उत्पादन हुने लक्ष्य रनिङ शिल्डको छ ।
गण्डकी प्रदेशस्तरीय राष्ट्रपति रनिङ शिल्ड उद्घाटन गर्दै सभामुख धितालले खेलकुद स्वास्थ्यका लागि आवश्यक रहेको बताए ।
पछिल्लो समय खेलमा रुचीहरु बढेको बताए । “मनोरञ्जनको दृष्टिकोण र राष्ट्रको सानका लागि समेत खेलकुद महत्वपूर्ण छ। व्यवस्थापनका लागि केही अप्ठ्यारा रहेपनि राज्यले समेत महत्व दिँदै आएको छ” सभामुख धितालले भने ।
प्रदेश सरकारका प्रमुख सचिव रविलाल पन्थले आगामी बजेटमा खेलकुद प्रतियोगिता र खेल पूर्वाधार निर्माणलाई प्रदेश सरकारले प्राथमिकता दिने बताए ।
प्रदेश खेलकुद परिषद्का निर्वतमान सदस्य सचिव तेजबहादुर गुरुङले गत असोजमा पोखरामा सम्पन्न नवौँ राष्ट्रिय खेलकुद प्रतियोगितामा प्रदेशहरुमा गण्डकी प्रथम हुन सफल भएको बताए ।
उनले विद्यालयस्तरदेखीनै खेल प्रतिभा पहिचान, छनोट र विकास आवश्यक रहेको उल्लेख गरे । प्रतियोगिता वैशाख १२ गतेसम्म सञ्चालन हुनेछ ।
