काठमाडौ । काठमाडौँ पूर्वप्रधानन्यायाधीश तथा मन्त्री परिषद्का पूर्वअध्यक्ष खिलराज रेग्मीको प्रमुख आतिथ्यतामा ऐतिहासिक पुस्तक शहीद स्मृतिग्रन्थको लोकार्पण भएको छ ।
शहीद चिनियाँलाल सिंह तथा समाजसेवी उषा सिंह स्मृति प्रतिष्ठानले ओझेलमा परेका नेपालको प्रजातान्त्रिक आन्दोलनमा महत्वपूर्ण योगदान दिने शहीदहरुको सोधखोज गरी तिनका विविध पक्ष र जीवनीका बारेमा ऐतिहासिक जानकारी दिने उद्देश्यले ४३२ पृष्ठको ८२ वटा लेख रचना समाविष्ट गरी प्रकाशित गरिएको शहीद स्मृतिग्रन्थको बागबजारस्थित हार्दिक होटलमा एक भब्य समारोहबीच लोकार्पण गरिएको हो ।
उक्त कार्यक्रम प्रसिद्ध हास्यव्यङ्ग्यकार रामकुमार पाँडेको अध्यक्षतामा सम्पन्न तथा संस्कृतिविद् तथा प्रज्ञा प्रतिष्ठानका पूर्वउपकुलपति जगमान गुरुङ, सीमाविद् बुद्धिनारायण श्रेष्ठ, कामनपा १० का पूर्वअध्यक्ष नरसिह व्यञ्जनकार, प्राध्यापक डाक्टर यादवप्रसाद ढुंगाना लगायत नेपालका प्रतिष्ठित व्यक्तिहरूको उपस्थिति रहेको थियो ।
कार्यक्रममा मन्त्रिपरिषद्का पूर्वअध्यक्ष तथा पूर्वप्रधानन्यायाधीश रेग्मीले जनताले श्रवण गर्न लायक राष्ट्रका लागि समर्पित शहीदहरुलाई सम्झदा मात्र पनि जीवन प्रेरित हुने भएकोले यी र यस्तै कामहरु यो संस्थाले गर्दै अझ अगाडि बढोस् भनेर शुभकामना दिएका थिए।
संस्कृतिविद् तथा प्रज्ञा प्रतिष्ठानका पूर्वउपकुलपति गुरुङले यस पुस्तकले एउटा अनुकरणीय काम गरेको भन्दै सरकारी श्रेस्ताबाट प्रमाणित भएका र नभएका तर श्रुति परम्पराबाट सुन्दै आएका शहीदहरूको खोजी यसैगरी गरिनुपर्छ भनेका थिए।
त्यस्तै लोकप्रिय हास्यव्यङ्ग्यकार पाँडेले शहीद चिनियाँलाल सिंहले स्थापित गरेको महावीर इन्स्टिच्युटले नेपालमा राष्ट्रिय भावना र सामाजिक शैक्षिक र राजनीतिक चेतना फैल्याउन महत्वपूर्ण भूमिका निर्वाह गरेको बताए ।
साथमा जेल पर्दा खाना र औषधि नदिएकोले जेलबाट निस्कने बित्तिकै शहीद चिनियाँलाल सिंहको मृत्यु भएकोले उनलाई शहीद घोषणा गर्न यो संस्था अग्रसर रहेको पनि बताए ।
कार्यक्रममा अधिकांश वक्ताहरुले पुस्तक नेपालका शहीदहरुको बारेमा अध्ययन गर्नका लागि ज्यादै नै महत्वपूर्ण रहेको बताएका थिए भने अन्त्यमा संस्थाका कोषाध्यक्ष सरस्वती पन्त भट्टराईले पुस्तक प्रकाशनमा साथ दिने सबैलाई धन्यवाद दिएर कार्यक्रमको समापन गरेकी थिइन् ।
प्रकाशित मिति: शनिबार, जेठ २०, २०८० १९:०९
