काठमाडौ । सर्वोच्च अदालतले कोभिड-१९ को नियन्त्रण तथा न्यूनीकरणका लागि जारी निषेधाज्ञाका समयमा होम डेलिभरी नरोक्न आदेश जारी गरेको छ।
कोभिड–१९ को नियन्त्रण तथा न्यूनीकरणका लागि जारी निषेधाज्ञाका समयमा अनलाइनबाट हुने कारोवार तथा होम डेलिभरी नरोक्न सर्वोच्च अदालतले सरकारका नाममा अन्तरिम आदेश जारी गरेको हो ।
न्यायाधीशद्वय सपना मल्ल र डा. कुमार चुँडालको इजलासले सामान बिक्रीवितरण नरोक्न अन्तरिम आदेश जारी गरेको हो।
अदालतको आदेशमा भनिएको छ, “सामाजिक दूरी, मास्क, स्यानिटाइजर, पिपिइ लगायतका साधनको प्रयोग गरी खरीदबिक्री तथा होम डेलिभरीको सेवा प्रदान गर्ने कम्पनीहरुलाई प्रस्तुत मुद्दाको अन्तिम किनारा नलागेसम्मका लागि सेवा प्रदान गर्ने काम रोक्ने कार्य नगर्नू।”
बजारमा भीडभाड कम गरी सकेसम्म नागरिकलाई घर बाहिर जानु नपर्ने स्थिति सिर्जना गर्नका लागि अनलाइनका माध्यमबाट खरीदबिक्री तथा होम डेलिभरी प्रदान गर्नमा रोक लगाउन उपयुक्त नहुने आदेशमा जनाइएको छ ।
प्रकाशित मिति: सोमबार, जेठ २४, २०७८ २१:३२
