काठमाडौ। आँट, धैर्य र साहसका प्रतिक विलक्षण प्रतिभाका धनी कलाकार स्वतन्त्र संसार महर्जन विरामी परेका छन्। कलाकार महर्जन एकाएक सोमवार छातिमा असहज भएपछि राति नै काठमाडौंको बाँसबारीस्थित गंगालाल मुटुरोग अस्पतालमा भर्ना भएका हुन्।
गंगालाल मुटुरोग अस्पतालले तत्काल कलाकार महर्जनलाई हर्ट अटेक भएको डाइगोनिसिक गरेपछि तुरुन्तै त्यसको उपचार गरिएको थियो। जसको कारण कलाकार महर्जनलाई केही सहज र आराम मिलेको पारिवारिक स्रोतले जनाएको छ।
केही दिन गंगालाल मुटुरोग अस्पतालमा नै बसेर पूर्णरुपमा स्वास्थ्यलाभ भएपछि घर फर्कने बताउने कलाकार महर्जनको पूर्ण स्वास्थ्यलाभको कामना गर्न अस्पताल पुग्ने तथा सामाजिक सञ्जाल फेसबुक मार्फत कामना गर्नेहरुको भीड लागेको छ।
नेपालमा कसैले नगरेको सर्वाधिक लामो तथा धेरै अवार्ड भएको अवार्ड अनि सम्मान कार्यक्रम गरेर नेपालभाषा क्षेत्रमा अतुलनीय योगदान दिदैआएका कलाकार महर्जन चुप लागेर बस्दै नबस्ने विलक्षण प्रतिभाका कलाकारका रुपमा चिनिन्छ।
दर्जनौ दर्जन नेपाली चलचित्र तथा टेलिचलचित्रमा अभिनय गरेर बेग्लै इमेज राखेका कलाकार महर्जनले एकदशक यता नेपालभाषा क्षेत्रमा विभिन्न माध्यमवाट विशिष्ट योगदान दिँदै आएका छन्।
कलाकारिताको क्रममा डाँफेचरी नै मानिएका कलाकार महर्जन फाइट दृश्य दिने क्रममा मेरुदण्डमा चोट लाग्न पुगेपछि स्पाइनल कर्ड इन्ज्वरी भएको थियो ।
त्यसपछि शारीरिक रुपमा विगत सात बर्षदेखि समस्या खेप्दैआएका कलाकार महर्जनले त्यसलाई समस्याको रुपमा नलिइकन कलाकारिता तथा भाषाको क्षेत्रमा अनवरत कार्यरत रहदैआएका थिए ।
शनिवार मात्र खोकनामा भएको भव्य कार्यक्रममा कलाकार महर्जनले यसलाई निरन्तरता दिदैजाने बताएका थिए । हारलाई पनि विजयका रुपमा लिँदैआएका कलाकार महर्जन सवैका लागि प्रेरणाको बलियो स्रोत पनि हुन्।
प्रकाशित मिति: मंगलबार, असार १२, २०८० १५:५६
