काठमाडौं। नेपाल वाहिर भारतको सिक्किममा विशिष्ट हास्य कलाकार महजोडी मदनकृष्ण श्रेष्ठ र हरिवंश आचार्यलाई अभिनन्दन गरिएको छ।
भारतको सिक्किमको गान्तोकमा महजोडीलाई अभिनन्दन गरिएको हो। महजोडीलाई नेपाली साहित्य परिषद् सिक्किमले भानुजयन्तीको अवसर पारेर अभिनन्दित गरेको सिक्किमवाट प्राप्त समाचारमा उल्लेख छ।
हास्य विधाका ‘महासम्राट’ र ‘अद्वीतीय व्यक्तित्व’ भन्दै महजोडीलाई विशेष सम्मानपत्र, फूलमाला, दोसल्ला ओढाएर सिक्किम सरकारका, सभामुख, मन्त्री सोनाम लामा, मुख्यमन्त्री पिएस तामाङका राजनीतिक सल्लाहाकार ज्याकव खालिङ नेपाली साहित्य परिषद् सिक्किमका अध्यक्ष हरि ढुंगेललगायतले अभिनन्दन गरेका थिए।
तीन चरणमा गरिएको भानुजयन्ती समारोहमा पहिलो चरणमा मुख्यमन्त्री पिएस तामाङले महजोडीलाई खादा ओढाएर सम्मान अर्पण गरेका थिए।
सिक्किमले हरेक वर्ष एक विशेष र भव्य रूपमा भानुजयन्ती मनाउँदै आएको छ । सिक्किममा यो दिवस राज्य दिवसका रूपमा मनाउने गरिन्छ। यो अवसरमा भारतका अन्य राज्यबाट विशिष्ट साहित्यकार र सर्जकको उपस्थिति रहेको थियो।
भानुजयन्तीका अवसरमा हरेक वर्ष प्रदान गरिँदै आएको सिक्किमको प्रतिष्ठित पुरस्कार यो वर्ष सिक्किमका वरिष्ठ साहित्यकार थीरूप्रसाद नेपाललाई प्रदान गरिएको छ ।
प्रकाशित मिति: शनिबार, असार ३०, २०८० २२:२६
