काठमाडौं । नेपाली चलचित्र उद्योगका बुलन्द जोडी कलाकारत्रय दीपकराज गिरी, दीपाश्री निरौला र निर्मल शर्माले संचालनमा ल्याएको नयाँ सिनेमा हलको शुभारम्भ भएको छ।
काठमाडौंको नयाँ बाँनेश्वर शंखमूल स्थित ‘आइएनआई सिनेमाज्’को शुत्रवार शुभारम्भ भएको हो।
नेपाल उद्योग बाणिज्य महासंघका अध्यक्ष चन्द्र ढकाल र ख्यातिप्राप्त हांस्य अभिनेता हरिवंश आचार्यले रिवन काटेर उदघाटन गरेपछि कलाकारत्रय दीपकराज गिरी, दीपाश्री निरौला र निर्मल शर्माले सिनेमा हल शुभारम्भ भएको घोषणा गरेका थिए।
अभिनेत्री दीपाश्री निरौलाका अनुसार, आईएनआइको व्यवस्थापन भएको सिनेमा हलमा २ पर्दा छन् । जसमा २१० र १७७ सिट क्षमता छ।
उद्घाटन कार्यक्रममा बोल्दै हल संचालक दीपकराज गिरीले नेपाली फिल्मलाई ५० प्रतिशत शेयर दिने घोषणा समेत गरे। उनले भने–‘निर्माताहरुको असन्तुष्टी शोज बाँडफाँडमा त छदै छ ।
शेयरमा पनि हो। यो बिषयमा कार्यदलले छलफल गरिरहेको छ । तर, हामी भने यो हलमा नेपाली फिल्मलाई ५० प्रतिशत शेयर दिने घोषणा गर्दछौं।’
नेपाली फिल्मले रिलिजको पहिलो साता ५०, दोश्रो साता ४५, तेश्रो साता ४० र त्यसपछि ३५ प्रतिशत शेयर पाउँदै आएका छन्। तर, अब आइएनआई नयाँ बाँनेश्वरमा भने नेपाली फिल्म जति साता चलेपनि ५० प्रतिशत नै शेयर पाउनेछन्।
कार्यक्रममा बोल्दै दीपकराज गिरीले नेपाली फिल्मलाई प्राथमिकता दिने बताए । उनले, निर्माताबाट हल संचालक बन्दै गर्दा आफूले बिचमा बसेर कुरा गर्नुपर्ने अवस्था आएको बताए । कार्यक्रमका प्रमुख अतिथी चन्द्र ढकाल र विशेष अतिथी हरिवंश आचार्यले हलको सफलताको शुभकामना दिए ।
करिब १० करोड बजेटमा तयार पारिएको हलमा अत्याधुनिक प्रविधि जडान गरिएको बताइएको छ । साउन्ड सिस्टममा पनि नेपालमै पहिलो पटक नयाँ प्रविधि भित्राइएको अर्का हल संचालक निर्मल शर्माको भनाई छ।
प्रकाशित मिति: शुक्रबार, भदौ २९, २०८० १६:४७
