काठमाडौं। काठमाडौं जिल्लाको उत्तर–पूर्वमा अवस्थित कागेश्वरी मनोहरा नगरपालिका वडा १ गागलफेदीमा रहेको कागेश्वरी महादेव मन्दिरमा महामेला लागेको छ । भाद्र शुक्ल अष्टमी अर्थात् कागे अष्टमी आज शनिवारका दिनवाट महामेला लागेको हो।
तीनदिनसम्म चल्ने यो मेलाको धामिर्क तथा पर्यटकीय विशेष महत्व रहेको छ। नगरपालिकाको नाम नै कागेश्वरी मनोहरा नगरपालिका भएकाले पनि यस धार्मिक पर्यटकीय स्थललाई नगरपालिकाले विशेष महत्व दिएको छ।
किंवदन्तीअनुसार परापूर्व कालमा कागले गाईको दूध पहरामा रहेको शिवलिङ्गमा चढाउँदै गरेको गोठालाले देखेपछि त्यहाँ खोस्रेर हेर्दा महादेवको मूर्ति फेला परेको र त्यसै बेलादेखि यस मन्दिरको नाम कागेश्वरी महादेव मन्दिर रहन गएको हो।
रसुवाको गोसाइँकुण्डमा मेला भर्ने दर्शनार्थीले त्यहाँको पवित्र जल ल्याई कागेश्वरी महादेवलाई चढाउँदा आफ्नो इच्छासमेत पूरा हुने जनविश्वास रहिआएको छ।
यो ऐतिहासिक महत्व बोकेको धार्मिक स्थलका रूपमा पनि परिचित हुँदै गइरहेको अवस्था छ भने सत्ययुगमा सेती देवीको अङ्ग पतन भएर कागेश्वरी महादेवको शिवलिङ्ग उत्पन्न भएको हो भन्ने विभिन्न शास्त्रमा समेत उल्लेख गरिएको पाइन्छ।
कागेश्वरी मनोहरा नगरपालिकाले पर्यटकीय गन्तव्य स्थलको रुपमा विकास गर्न र गराउन मन्दिरमा कागेश्वरी महादेव मन्दिरको पहिचानका रूपमा २ सय २७ किलोको धातुको कागको मूर्ति बनाएको छ। कागेश्वरी महादेव एक भौतिक, सांस्कृतिक, धार्मिक पहिचान बोकेको महान धार्मिक स्थल हो ।
प्रकाशित मिति: शनिबार, असोज ६, २०८० १०:०७
