काठमाडौ । युरोप भ्रमणमा रहेका अभिनेता एवं चलचित्र विकास बोर्डका अध्यक्ष भुवन केसी यतिबेला माल्टा पुगेका छ।
स्वीट्जरल्याण्ड हुँदै माल्टा पुगेका अभिनेता एवं चलचित्र विकास बोर्डका बोर्डका अध्यक्ष केसीले त्यहाँस्थित ब्लु हर्स इन्टरटेन्मेन्टको उद्घाटन गरेको हो।
एमसिदाजिराको ब्ल्याकपर्ल रेष्टुराँमा आयोजित समारोहमा अध्यक्ष केसीले माल्टाबासी नेपालीहरुमाँझ नेपाली चलचित्र र कला संस्कृतिको प्रवद्र्वनमा सघाउन समेत आग्रह गरेका थिए।
नेपालीपनको आभाष दिलाउन सक्ने कार्यक्रम आयोजना गर्न सके बोर्डबाट हुन सक्ने सम्पूर्ण सहयोग गर्न तयार आफू रहेको उनले बताएका छन्।
लोक गायिका सुनिता दुलाल समेत सहभागी कार्यक्रममा उनको सांगीतिक प्रस्तुतिले माहौंल तताएको थियो। उनले आफ्ना चर्चित गीतहरु सुनाएर मनोरञ्जन प्रदान गरेकी थिइन्। नायिका जिया केसीसँगै त्यहाँ पुगेका अभिनेता केसीले समेत कार्यक्रममा गीत गाएर थप रौनकता थपेका थिए ।
युरोपका विभिन्न मुलुकमा नेपाली कला संस्कृति, एवं भेषभुषाको प्रवद्र्धनसँगै व्यावसायिक ढंगले विभिन्न मनोरंजनात्मक गतिविधि आयोजना गर्ने उद्देश्यले उक्त संस्था खोलिएको यसका परिकल्पनाकार तथा संरक्षक जिके शर्माले बताए।
यसका निम्ति नेपालस्थित राइजमिडिया नेटवर्कसँग सहकार्यका निम्ति समझदारी भएको समेत उनले जानकारी गराए। राइज मिडिया अडियो भिडियो निर्माण तथा इभेन्ट म्यानेजमेन्टसँगै सञ्चार क्षेत्रमा आबद्ध संस्था हो।
माल्टा लगायत युरोपमा रहेका नेपालीहरुलाई एकताबद्ध गरी नेपालको मौलिकतालाई युरोपमा प्रवद्र्वन गर्न ब्लु हर्स इन्टरटेन्मेन्ट निरन्तर सक्रिय रहने समेत शर्माको भनाई थियो । यस संस्थाको संरक्षक उदयबाबु श्रेष्ठ रहेका छन् ।
गैर आवासीय नेपाली संघ राष्ट्रिय समन्वय परिषद् माल्टाका अध्यक्ष रेमलाल खनाल (रेम्स) तथा संस्थापक अध्यक्ष तेजवहादुर लिम्बु द्वयले नेपाली कला संस्कृतिको प्रवद्र्धनका लागि नयाँ खुलेको संस्थालाई सहयोग गर्ने प्रतिबद्धता जनाएका थिए।
एनआरएन माल्टाका सल्लाहकार हरि बिसिले समग्र टिमलाई शुभकामना व्यक्त गर्दै ब्लु हर्ष ईन्टरटेन्टमेन्टले युरोपमा रहेका नयाँ प्रतिभाहरुलाई आफ्ना प्रतिभा प्रस्फुटन गर्न महत्वपूर्ण अवसर प्रदान गर्न सक्ने विचार व्यक्त गरेका थिए।
माल्टाबासी नेपाली, विभिन्न संघ संस्थाप्रतिनिधि एवं व्यावसायीहरुको उपस्थिति रहेको कार्यक्रम ब्लु हर्स इन्टरटेन्मेन्ट संयोजक डम्बर राणाको संयोजकत्वमा भएको थियो।
कार्यक्रमको सञ्चालन असिम लोप्चनले गरेका थिए। माल्टा पछिल्लो समय नेपालीहरुका लागि रोजगारीको आकर्षक गन्तव्य बनेको छ।
प्रकाशित मिति: बुधबार, असोज १७, २०८० ०९:०९
