काठमाडौं। काठमाडौं महानगरपालिका वडा नंबर १८ का वडा अध्यक्ष न्हुच्छेकाजी महर्जन वडा सरकार प्रमुखका रुपमा परिचित छन्। वडा अध्यक्षको रुपमा परिचित भएतापनि गीत लेखन महर्जनको बेग्लै खुबी हो।
फुर्सदको बेला गीत लेखनमा पनि त्यतिकै सक्रिय वडा सरकार प्रमुख महर्जन अव गीतकार मात्र नभइकन नायक पनि बनेका छन्। वडा सरकार प्रमुख महर्जनको आफ्नै गीत छंगु नुगलय बोलको गीतको म्युजिक भिडियोमा नायिका रति महर्जनको नायक बनेर अभिनय गरेका छन्। सानैदेखि चलचित्रमा नायक बन्ने अतृप्त रहरलाई आफ्नै गीतको भिडियोमा भएपनि नायक बनेर तृप्त बन्ने प्रयास गरेको महर्जनले भनेका छन्।
राजनीतिमा लागेको ३३ बर्ष भैसकेको अवस्थामा चलचित्रको अभिनयमा आउंदा समयको अभावले अलि गाह्रो महशुश भएतापनि आफूभित्रको सानैदेखिको चाहना पूरा भएकोमा उनी दंग छन्। युगिन चलचित्र निर्देशक पवन जोशीको निर्देशनमा सहज ढंगवाट स्वभाविक अभिनय गरेका महर्जनको अभिनय गजब नै छ।
कला र कलाकारिता मार्फत नेपाली कला तथा संस्कृतिको जगेर्ना गर्ने अभियानमा नै लागेका वडा सरकार प्रमुख महर्जन अभिनित गीतमा गायक राजेन्द्र शाक्य र गायिका सरस्वती मानन्धरको गायन रहेको छ। छायाँकन र सम्पादन सोहन मानन्धरको छ । त्यस्तै, संगीत तथा रेकर्डिङ अग्रज संगीतकार दीप तुलाधरले गरेका हुन्।
त्यस्तै, यसअघि निर्देशक पवन जोशीकै निर्देशनमा डेढ बर्षअघि नेपाली भाषामा महर्जनकै गीत लेखन रहेको किन दुख्न थाल्यो छाति बोलको गीतमा पनि उनले अभिनय गरेका थिए । त्यस अभिनयमा भावुक कलाकारको रुपमा अभिनय गरेका महर्जनले छंगु नुगलय बोलको गीतको म्युजिक भिडियोमा नायक बनेर अभिनय गरेर आफूभित्रको नायकत्व प्रदर्शन गरेका छन्।
विसं.२०४६ सालको जनआन्दोलनसंगै नेपाली राजनीतिमा होम्मिएका महर्जन विसं.२०५४ सालको स्थानीय निर्वाचनमा वडा सदस्यमा निर्वाचित भएका थिए। त्यसको लामो समयको अन्तरालमा भएको स्थानीय सरकारको निर्वाचनमा विसं.२०७४ सालमा काठमाडौं महानगरपालिका वडा नंबर १८ को वडा अध्यक्षमा भारी मतले निर्वाचित भएका हुन्।
पहिलो इनिङ्गमा वडावासीको चाहना बमोजिम निक्कै राम्रो विकास–निर्माणको कार्य गर्न सफल भएको कारण विसं.२०७९ सालमा भएको निर्वाचनमा पनि १८ वडावासीले महर्जनलाई भारी मतले निर्वाचित गरेर पुरस्कृत गरेको हो। वडावासीको आफूप्रतिको विश्वास र जनमतको कदर आफूले सदा शिरोपर गरेर अगाडि बढ्ेको पनि महर्जनले बताएका छन्।
दोश्रो इनिङ्गको डेढ बर्ष पुगिसक्दा अघिल्लो निर्वाचनमा आफूले प्रतिवद्धता व्यक्त गरेका धेरै विकास–निर्माण कार्य गर्न र गराउन आफू सफल भएको महर्जन भन्छन्। जनचाहना र जनअपेक्षा अनुरुपका सवै कार्य गर्न आफू सदा तत्पर भएर लाग्दैआएको पनि उनले बताए । विजया दशमी, शुभ दीपावली, नयाँ बर्ष नेपाल संवत ११४४ तथा छठ पर्वको मंगलमय शुभकामना पनि महर्जनले सवैलाई व्यक्त गरेका छन्।
(नामी साप्ताहिकवाट साभार)
प्रकाशित मिति: आइतबार, कात्तिक ५, २०८० १४:३८
