काठमाडौँ । नेपाल सन् २०२४ मा अमेरिका र वेस्ट इन्डिजमा हुने आईसिसी मेन्स टी-२० विश्वकपमा छनोट भएको छ।
माथिल्लो मुलपानी क्रिकेट मैदानमा संयुक्त अरब इमिरेट्स (युएई)लाई आठ विकेटले पराजित गर्दै नेपाल दोस्रो पटक विश्वकपमा छनोट भएको हो।
यूएईले दिएको १ सय ३५ रनका लक्ष्य नेपालले १७ दशमलव १ ओभरमा २ विकेटको क्षतिमा पूरा गर्यो। नेपालको जीतमा विकेटकिपर आशिफ सेखले अर्धशतकीय पारी खेले । उनले ५१ बलमा २ छक्का र ६ चौकाको सहयोगमा ६४ रन बनाए।
कप्तान रोहित पौडेलले १ छक्का र ३ चौकको सहयोगमा ३५ रन बनाए भने गुलशन झाले २२ र कुशल भुर्तेलले ११ रन बनाए। यूएईका लागि निलान्स केस्वानी र बसिल हमिदले १/१ विकेट लिए।
टस जितेर पहिले ब्याटिङ रोजेको यूएईले निर्धारित २० ओभरमा ९ विकेटको क्षतिमा १ सय ३४ रन बनायो। यूएईका लागि विकेटविकपर वृत्या अरविन्दले सर्वाधिक ६४ रन बनाए । उनले ५४ बल खेल्दै २ छक्का र ८ चौका प्रहार गरे।
कप्तान मोहम्मद वासिमले १६ बलमा २ छक्का र ३ चौकासहित २६ रन बनाए। आसिफ खानले १३, अलिसन सफारुले १६ रन बनाए भने अन्य ब्याटरले उल्लेखनीय योगदान दिन सकेनन्।
नेपालका लागि कुशल मल्लले ३ र सन्दीप लामिछानेले २ विकेट लिए। साथै सोमपाल कामी र राहित पौडेलले १र१ विकेट लिए। दुई ब्याटर रन आउट भए।
नेपाल समूह ‘ए’ बाट उपविजेता र युएई समूह ‘बी’ को विजेता बन्दै सेमिफाइनलमा पुगेका थिए। समूहको अन्तिम खेलमा नेपाल ओमानसँग पाँच रनले पराजित भएको थियो ।
समूह चरणको आफ्नो पहिलो खेलमा नेपालले सिङ्गापुरलाई ८ विकेट र मलेसियालाई ६ विकेटले पराजित गरेको थियो।
आजै भएको पहिलो सेमिफाइलमा ओमानले बहराइनलाई १० विकेटले पराजित गरेको छ। आइतबार हुने फाइनलमा नेपाल र ओमान भिड्नेछन्।
प्रकाशित मिति: शुक्रबार, कात्तिक १७, २०८० १४:२७
