भैरहवा, रुपन्देही । रुपन्देहीको तिलोत्तमा नगरपालिकामा एकल लगानीमा नीजि रङ्गशाला निर्माण भएको छ।
अष्ट्रेलियामा बस्ने गुल्मीका विनोद कुँवरले तिलोत्तमा नगरपालिका-१७ दरखसवामा साढे ५ विगाह जग्गामा एकल लगानीमा क्रिकेट मैदान बनाउन थालेको हो।
एक्स्ट्राटेक ओभल क्रिकेट मैदान नाम राखिएको यो काम पूरा गर्न उनी दुई महिना यता कर्मभूमि छाडेर नियमित रुपमा मैदानमा क्रियाशील रहेको छ।
यो मैदानका लागि जग्गा बाहेक ४० करोड लगानी लाग्नेछ। यो लगानी चरणवद्ध रूपमा लगाउने र समयमै पूरा गर्ने कुँवरको योजना रहेको छ।
भविष्यमा क्रिकेटको लागि मैदान मात्र नभई त्यहीबाट नै क्रिकेट आवासीय क्रिकेट एकेडेमी सञ्चालन गर्ने कुंवरको योजना रहेको छ।
असोजको तेस्रो हप्ताबाट पहिलो चरणको कार्य शुरु भएको हो। ३ हजार ट्रिपर माटो राखेर मैदान सम्म्याइएको छ। मैदान र पिचमा दुबो लगाउने काम सम्पन्न गरिएको छ।
मैदान वरपर ड्रेन निर्माण गर्नुका साथै फेन्सिङ गरिएको छ। पिच बनाइएको छ। साइड स्क्रिनको काम यो हप्तामै सम्पन्न हुने तयारीमा छ।
माघबाट दोस्रो चरणको काम शुरु हुनेछ । यसमा पेभेलियन, चेन्जिङ रुम, क्यान्टिन, टेक्निकलका लागि रुमहरूको ५ हजार क्षमताको निर्माण कार्य शुरु गरिने छ।
चैतबाट साइडको सानो मैदानको काम पनि शुरु हुनेछ । जहाँ प्रशिक्षण गर्न मिल्नेछ।
अर्को चरणमा मिडिया सेन्टर र थप प्याराफिट निर्माणको कार्य शुरु हुनेछ। प्रत्येक वर्ष ५ हजार दर्शक क्षमता थप्दै ४ वर्षभित्र २५ हजार दर्शक क्षमताको क्रिकेट मैदानलाई रंगशालाको स्वरूपमा निर्माण सम्पन्न गर्दा ४० करोड रुपैयाँ लाग्ने अनुमान गरिएको छ।
२०८० साल जेठ २९ गते शिलान्यास भएको मैदानको ६ महिनाको अवधिमा पहिलो चरणको काम सम्पन्न भएको एक्स्ट्रा ओभल प्रालिका निर्देशक विनोद कुँवरले बताए। यो अवधिमा १८ प्रतिशत काम सकिएको उनले जनाए।
रुपन्देहीमै निजि क्षेत्रबाट क्रिकेट मैदान निर्माण पछि यहाका खेलप्रेमीहरु हौसिएका छन्। यसले यस क्षेत्रमा खेलको विकास गर्न थप टेवा पुग्ने उनीहरुको भनाइ छ।
पूर्व राष्ट्रिय क्रिकेट खेलाडी तथा एक्ट्राकेटका ब्राण्ड एम्बेसडर शक्ति गौचनले खेलको पूर्वाधार विकास गर्न सके धेरै उत्कृष्ट खेलाडी उत्पादनमा बल पुग्ने भएकाले सबै प्रदेशमा यस प्रकारका मैदान तयारी गर्नुपर्ने सुझाव दिए।
देश खेलकुद परिषद् लुम्बिनीका सदस्यसचिव जयप्रकाश भट्टराईले निजी क्षेत्रबाट क्रिकेटको विकासमा भएको लगानीले उत्साह थपेको बताए।
प्रकाशित मिति: सोमबार, पुस २, २०८० १३:४७
