काठमाडौँ । प्रधानमन्त्री पुष्पकमल दाहाल ‘प्रचण्ड’ले उदयपुर सिमेन्ट उद्योगको अवलोकन गरेको छ।
उद्योग रहेको स्थान उदयपुरको जलजले पुगी प्रधानमन्त्री दाहालले उद्योगको प्लान्टलगायत महत्वपूर्ण संरचनाको अवलोकन गरेको हो।
प्रधानमन्त्री दाहाललाई महाप्रबन्धक खगेन्द्र बस्नेतलगायतका उच्चपदस्थ अधिकारीले उद्योगको समग्र अवस्थाबारे जानकारी गराएका थिए। सोही क्रममा प्रधानमन्त्री दाहालले उद्योगलाई यही अवस्थामा नभई ‘अपग्रेड’ गरेर सञ्चालन गर्नुपर्ने बताएका थिए।
आफूले उद्योगको समस्यालाई गम्भीर रुपमा लिएको उल्लेख गर्दै प्रधानमन्त्री दाहालले उद्योगलाई दीर्घकालीनरुपमा सञ्चालन गर्न सरकार तयार रहेको बताएका थिए। अहिले उद्योग पूर्ण क्षमतामा सञ्चालन हुन सकेको छैन।
उदयपुर सिमेन्टर नेपाल सरकारद्वारा सञ्चालित सिमेन्ट उद्योग हो। नेपाल र जापान सरकारको संयुक्त लगानीमा विसं २०४४ जेठ ३१ गते सो उद्योगको स्थापना भएको हो।
उक्त उद्योगले उत्पादन गरेको ‘गैँडा छाप’ ब्राण्डको सिमेन्ट नेपाली उपभोक्तामाझ लोकप्रिय छ।
प्रकाशित मिति: शनिबार, माघ २०, २०८० २१:२८
