काठमाडौँ । राजधानीकाे किर्तीपुरमा जारी त्रिकोणात्मक टी-२० सिरिजअन्तर्गत भएको खेलमा नेपालले नेदरल्यान्ड्सलाई ६ विकेटले पराजित गरेको छ।
आज भएकाे खेलमा जितका लागि १ सय २१ रनको सामान्य लक्ष्य पछ्याएको नेपालले १५ दशमलव २ ओभरमा ४ विकेट गुमाएर लक्ष भेट्टाएको हो।
नेपालको जितमा कप्तान रोहितकुमार पौडेलले सर्वाधिक ४६ रनको योगदान दिएका थिए। उनले ३४ बलमा ३ चौका र १ छक्काको मद्दतले सर्वाधिक ४६ रनको योगदान गरेका थिए। त्यसैगरी गुल्सन झाले ३८, कुशल भुर्तेलले १२ र आसिफ सेखले ८ रन जोडेका थिए।
नेदरल्यान्ड्सका लागि भिभियन किंगमाले ३ विकेट लिए भने आर्यन दत्तले एक विकेट लिएका थिए।
त्यसअघि कीर्तिपुरस्थित टियु अन्तर्राष्ट्रिय क्रिकेट मैदानमा टस जितेर पहिला ब्याटिङ गर्ने निर्णय लिएको नेदरल्यान्ड्सले १९ दशमलव ३ ओभरमा सबै विकेट गुमाउँदै १ सय २० को योगफल बनाएको थियो।
नेदरल्यान्ड्सका लागि म्याक्स ओडोउडले २४ बलमा ४ चौका र १ छक्काको मद्दतले सर्वाधिक ३१ रनको योगदान दिए।
यसैगरी टिम भान डेर गुग्टेनले २४ रन जोडदा रोलोफ भान डेर मार्वीले अविजित २३ तथा कप्तान स्कट एड्वार्डसले १८ रन बनाएका थिए।
नेपालका लागि प्रतिश जिसीले ३ विकेट लिए भने करण केसी र कुशल मल्लले समान २र२ विकेट लिएका थिए। त्यस्तै दीपेन्द्रसिंह ऐरीले १ विकेट लिएका थिए।
यो जितसँगै ४ खेलमा ४ अङ्क जोडेका नेपालको फाइनल सम्भावना बलियो बनेको छ। त्यसैगरी पहिलो पराजय व्यहोरेको नेदरल्यान्ड्सको ३ खेलबाट ४ अङ्क रहेको छ।
नेपाल पहिलो खेलमा नामिवियासँग २० रन र दोस्रो खेलमा नेदरल्यान्ड्ससँग २ रनले पराजित भएको थियो।
यसैगरी तेस्रो खेलमा नेपालले नामिवियालाई ३ रनले पराजित गरेको थियो। भोलि नेदरल्यान्ड्स र नमिवियाबीच खेल हुनेछ।
प्रकाशित मिति: शनिबार, फागुन १९, २०८० १६:४५
