काठमाडौँ । नेपाल कम्युनिष्ट पार्टी (एमाले) का अध्यक्ष केपी शर्मा ओलीले सरकारले गरिबी रेखालाई घटाएर शून्यमा झार्नुपर्ने बताएको छ।
काठमाडौँ जिल्ला कमिटीको बृहत् कार्यकर्ता भेलालाई सम्बोधन गर्दै उनले सरकारले गरिबी शून्यमा झार्ने गरी काम गर्ने बताएको हो।
एमाले अध्यक्ष ओलीले अहिले गरिबीको रेखामुनि १७ प्रतिशतबाट बढेर २०.२६ प्रतिशतमा पुगेको उल्लेख गर्दै त्यसलाई शून्यमा झार्नुपर्ने बताएका हुन्।
“हामीले सरकारमा रहँदा निरपेक्ष गरिबीको रेखालाई १७ प्रतिशतमा झारेका थियौँ। तर अहिले त्यो बढेर फेरि २०.२६ प्रतिशतमा पुगेको छ। त्यसलाई घटाउनु छ। शून्यमा झार्नु छ,” उनले भने।
अध्यक्ष ओलीले एमाले देश बनाउने सङ्कल्प बोकेर हिँडेको पार्टी भएको धारणा राख्दै उनले आगामी निर्वाचनमा काठमाडौँमा गएको निर्वाचनको जस्तो हार अस्वीकार्य भएको बताए।
“पछिल्लो निर्वाचनमा १० प्रतिशतको हैसियतमा झर्याे। काठमाडौँका १० क्षेत्रमध्ये एउटा मुस्किलले जित्यौँ यो स्थितिलाई अनिवार्य बदल्नै पर्छ”, उनले भने, “एमालेलाई काठमाडौँमा यो अवस्था कुनै हालतमा स्वीकार्य छैन। एमालेले काम गरेर देखाएको हिसाबले पनि जुन परिमाण आएको छ। त्यो पीडादायी रहेको छ।”
उनले आगामी निर्वाचनमा काठमाडौँमा एमालेले ९० प्रतिशत मत ल्याउनुपर्ने बताए। अध्यक्ष ओलीले पार्टीका पक्षमा सामाजिक सञ्जालमार्फत बोल्न कार्यकर्तालाई आग्रह गरे।
“पार्टीका पक्षमा बोल्नुपर्याे। विपक्षीले लगाएका झुठो आरोपको खण्डन गर्नुपर्याे। यो झुठो हो भनेर सामाजिक सञ्जालमा किन टिप्पणी लेख्दैनौं”, उनले भने। अध्यक्ष ओलीले नेपाललाई समृद्ध र सुशासनयुक्त बनाउन खोजेको बताए।
प्रकाशित मिति: बुधबार, चैत ७, २०८० २२:३२
