म्याग्दी, बेनी । म्याग्दी सदरमुकाम बेनीमा परम्परागत जोगी नाँच प्रदर्शन गरिएको छ। बेनीको सांस्कृतिक पहिचान बनेको एकमहिने वर्षे नाँचअन्तर्गत जोगी नाच देखाइएको हो ।
नेवार समुदायको साझा संस्था नेपाल भाषा मंकाः खलःअन्तर्गतको युवाहरुको समूह ल्याम्हः पुचःको नेतृत्वमा बेनी बजार र मङ्गलाघाट बजारमा शुक्रबार दिनभर जोगीनाँच प्रदर्शन गरिएको थियो ।
करिब ३० जना बढी युवायुवती र बालक सहभागी भएर शिव, पार्वतीको भेषमा सजिएर परम्परागत जोगी नाँच देखाइएको जोगी नाँचका संयोजक सुशीलकुमार श्रेष्ठले बताए ।
उनका अनुसार नयाँ कलाकारलाई तालिम दिएर जोगी नाँचमा सहभागी गराइएको थियो । युवाको समूह नाँचगानसहित बजारमा निस्किएपछि दिनभर सर्वसाधारणले रुचिपूर्वक नाँच अवलोकन गरेका थिए ।
बजारमा जोगी नाँच प्रदर्शन गर्नुअघि लक्ष्मीनारायण मन्दिर परिसरमा महादेव र पार्वतीको पूजागरी उनीहरूलाई खुसी पार्न ताण्डव नृत्यसहित युवालाई जोगी बनाएर बजारमा नचाउने प्रचलन रहेको नेपाल भाषा मंकाःखलःका अध्यक्ष राजेन्द्रकुमार श्रेष्ठले बताए।
नृत्यका साथै घरघरमा पुगेर भिक्षास्वरुप सहयोग जुटाउने चलन पनि छ । भिक्षामा सङ्कलन हुने रकमलाई वर्षे नाँचको व्यवस्थापन तथा संरक्षणमा खर्च गरिन्छ ।
बेनी बजारमा बस्ती बसेदेखि नै यो नाँच देखाउन थालिएको हो । यस वर्ष लाखे नाँच, घोडा नाँच, जोगी नाँच, नागनागिनी नाँचसहित श्रीकृष्ण रथयात्रालगायत कार्यक्रम समावेश गरिएको ल्याम्हः पुचः का अध्यक्ष जेनेश श्रेष्ठले बताए।
प्रकाशित मिति: शनिबार, भदौ १५, २०८१ ०८:३३
