ढोरपाटन, बागलुङ । केही महिना अगाडिसम्म बागलुङको काठेखोला गाउँपालिकाका महिला फुसर्दिला थिए। तर अहिले उनीहरुलाई अचार बनाउन भ्याइनभ्याइ छ।
महिलालाई आत्मनिर्भर बनाउन अचार बनाउने तालिम दिएपछि उनीहरु व्यावसायिक बन्न थालेका छन्। गाउँपालिका र स्थानीय स्तरमा उत्पादन हुने तरकारी तथा फलफूलबाट महिलालाई अचार बनाउने तालिम दिइएको हो।
गाउँपालिका र नेपाला गाजा डेभलपमेन्ट फाउण्डेशनको सहकार्यमा चार वटा वडाका करिब २ सय महिलालाई तालिम दिएपछि अहिले उनीहरु व्यावसायिक रुपमा अचार बनाउन थालेका छन्।
काठेखोला गाउँपालिका–३ धम्जा, वडा नम्बर ५ बिहुँ, वडा नम्बर ७ रेश र वडा नम्बर ८ लेखानीका महिलालाई तालिम दिइएको हो।
स्थानीयस्तरमा उत्पादन भएका अकबरे खुर्सानी, मुला, गाजर, लसुन, अदुवा, कागती, करेला लगायतका तरकारी अन्यवस्तुबाट अचार बनाउन सिकाइएको नेपाला गाजा डेभलपमेन्ट फाउण्डेशनका सामाजिक परिचालिका यमुना बस्यालले बताए।
अचार बनाउने तालिम लिएपछि अहिले महिलाहरुले व्यावसायिक रुपमा अचार उत्पादन गर्न थालेका छन् । पहिले यतिकै खेर जाने मुला, स्कुस, खुर्सानी लगायतका तरकारीजन्य वस्तुलाई अहिले स्वादिष्ट अचार बनाउन थालेका छन्।
अचार उत्पादनबाट आत्मनिर्भर बन्न सक्ने अपेक्षा राखेका काठेखोलाका स्थानीय कोपीला पुन र हिराकुमारी पुनले बताए। सीपले महिलालाई उद्यमी बनाएको छ ।
बसाइँसराईले उजाडिदै गएको गाउँका महिलाहरु आयआर्जनसँग जोडिन थाल्नु सुखद हो । सरोकारवाला निकायले उनीहरुलाई थप प्रोत्साहान गर्न जरुरी देखिन्छ ।
प्रकाशित मिति: बुधबार, मंसिर ५, २०८१ २१:४९
