तम्घास, गुल्मी । गर्भवती र सुत्केरी महिलाहरुका लागि गुल्मीको रेसुङ्गा नगरपालिकाले पोषण प्याकेज उपलब्ध गराएको छ।
चालु आर्थिक बर्ष २०८१/८२ को वार्षिक नीति तथा कार्यक्रमअनुसार नगरपालिकाले चना, अण्डा, आयोडिनयुक्त नुन लगायतका सरसफाईका सामग्री एवम् न्यानो कपडा उपलब्ध गराएको हो ।
महिलाहरु प्रथम पटक गर्भ जाँच गरेदेखि चौथो पटक जाँच गर्दासम्म एवम् सुनौलो हजार दिनका आमाहरुलाई पोषण प्याकेज तथा सरसफाईका सामग्री उपलब्ध गराएको छ ।
चालु आर्थिक वर्षभरी यो कार्यक्रम सञ्चालन गर्नको लागि ५ लाख बजेटमा ‘आमासँग उपमेयर’ कार्यक्रम सञ्चालन गरिएको छ।
आमाले नै स्वस्थ्य खानेकुरा खाएपछि स्वस्थ बच्चा जन्मिने भएकोले सांकेतिकस्वरुप गर्भवती र सुत्केरीलाई पोषण प्याकेज उपलब्ध गराइएको नगरपालिकाकी स्वास्थ्य शाखा प्रमुख अन्जु घर्ती मगरको भनाई छ ।
चालु आर्थिक बर्षमा ३ सय जना गर्भवती हुने नगरको अनुमान छ । नगरका १४ वटा वडाका १६ वटा स्वास्थ्य संस्थामा महिनाको एकपटक नगरपालिकाको ‘आमासँग उपमेयर’ कार्यक्रम सञ्चालन हुनेछ ।
यसरी हेर्दा नगरपालिकाभरी १ सय ९२ पटक घुम्ती शिविर प्रदान गरिने छ । नगरपालिकाको समुह सेवा लिएर स्वास्थ्य संस्थामा जाँदा गर्भवतीहरुका लागि भिडियो एक्सरेको सुविधा पनि प्रदान गर्ने गरेको छ ।
यसका लागि २ लाख बिनियोजन गरिएको छ । तालिम प्राप्त जनशक्तिले भिडियो एक्सरे गर्ने नगरपालिकाले जनाएको छ। बाहिर अस्पतालमा भिडियो एक्सरे गराउँदा एकजनाको ८ देखि ९ सय रुपैँयासम्म पर्ने तर नगरपालिकाले निःशुल्क रुपमा भिडियो एक्सरेको सुविधा दिने वडा नम्बर ८ का वडाध्यक्ष निरञ्जन थापाले बताए ।
अस्पतालदेखि टाढा रहेका नगरको वडा नम्बर ५, ६, १०, ११, १२, १३ र १४ वडाका महिलाहरुलाई यो कार्यक्रमले धेरै नै लाभ पुग्ने गर्दछ।
यसै कार्यक्रम अन्तरगत हालसम्म नगरका ५७ महिलाले भिडियो एक्सरेको सुविधा लिएका छन्। भिडियो एक्सरेको समेत सुविधा थप हुँदा यो कार्यक्रमको प्रभावकारिता बढेको छ । रेसुङ्गा नगरपालिका-८ की विष्णु पाण्डेले बताइन्।
नगरमा अर्को पनि अल्ट्रासाउण्ड मेसिन भएकोले आगामी दिनमा घुम्ति अल्ट्रासाउण्ड सेवा थप प्रभावकारी हुने अपेक्षा छ । रेसुङ्गा नगरको घुम्ती अल्ट्रासाउण्ड सेवा अन्य पालिकाहरुको पनि अनुकरणीय छ।
प्रकाशित मिति: बुधबार, मंसिर १९, २०८१ ०८:४५
