ढोरपाटन, बागलुङ । बागलुङको काठेखोला गाउँपालिकाऔ६ बिहुँका ४१ वर्षीय सुरेश कँडेल १० वर्ष अगाडि लन्डन पुगे।
रोजगारीका लागि विदेशमा राम्रो कमाई हुने आशले लण्डन पुगेका कँडेल पाँच वर्षपछि स्वदेश फर्किए। विदेशको दुःख देखेपछि स्वदेश फर्किएको उनले काठमाडौँमा पाँच वर्ष होटल व्यवसाय गरे । होटल व्यवसाय राम्रो भए पनि उनलाई गाउँघरको यादले सताई रह्यो।
आधा दशक होटल व्यवसाय गरेका सुरेश अन्तत वि.सं. २०७७ सालमा गाउँ फर्किए। उनी गाउँ फर्कने समयमा देशभर कोरोना संक्रामणको फैलँदो थियो ।
कोरोना संक्रमणका कारण गाउँमा पनि अन्य काम गर्ने वातावरण थिएन । कँडेलका घरमा बाबाआमाले पहिलेदेखि नै सामान्य रुपमा दुध विक्री गर्दै आएको थियो । गाउँपालिकाले दुग्ध उत्पादन गर्ने किसानलाई भैँसी अनुदान दियो।
अनुदानमा पाएको भैँसीले सुरेशलाई दुध उत्पादनमा लाग्ने हौसला दियो । उनले थप दुई वटा भैँसी लिएर व्यवसायिक रुपमै दुध उत्पादन गर्ने निधो गरे । अहिले उनी जिल्लाकै दुग्ध उत्पादन गर्ने अब्बल किसानको रुपमा परिचित छन्।
सुरेशको भैंसीपालन व्यवसाय फस्टाउँदै गएपछि आम्दानी पनि राम्रो हुँदै गएको छ। अहिले उनलाई लन्डनमा नमिलेको खुशी भैँसी पालेर मिलेको छ । उनले भैँसी पाल्न थालेपछि वरपरका अन्य किसानले पनि व्यवसायिक रुपमा दुध उत्पादनमा लागेका छन्।
कँडेललाई अहिले घरपरिवारको पनि दरिलो साथ छ । चार वर्ष अगाडि फर्म दर्ता गरेका कँडेलले वार्षिक १५ हजार लिटर दुध बजारमा विक्री गर्दै आएको छ । दुई लाखबाट सुरु गरेको व्यवसायमा हालसम्म २५ लाख बढी लगानी गरि सकेको छ। उनको फर्ममा हाल सात वटा उन्नत जातका भैँसी छन् ।
बागलुङ बजार नजिक रहेको हुँदा दुध खपत राम्रो छ । कँडेलले वार्षिक २० लाखको दुध विक्री गर्दै आएको छ।
प्रकाशित मिति: बिहीबार, मंसिर २०, २०८१ २१:१५
