म्याग्दी, बेनी । भौगोलिक रूपमा विकट र दुर्गम क्षेत्रमा अवस्थित म्याग्दीको रघुगङ्गा गाउँपालिका-७ चिमखोलामा स्वास्थ्यचौकी भवन निर्माण भएपछि स्थानीयले खुसीयाली मनाएका छन् ।
गाउँपालिका र संघीय सरकारको १ करोड ७९ लाख ३९ हजार ३२ लागतमा दुईतल्ले सुविधा सम्पन्न स्वास्थ्य चौकी भवन निर्माण भएको हो । भवन निर्माण भएर सेवा सुचारु भएपछि एक समारोहकाबिच स्वास्थ्य चौकी भवनको उद्घाटन गरिएको छ।
उद्घाटन समारोहमा स्थानीयले नौमती बाजा सहित नाँचगान गरेर खुसीयाली मनाएका हुन्। नयाँ भवनबाट सरल र सहज रुपमा स्वास्थ्य उपचार सेवा लिन सुविधा पुगेको छ ।
चिमखोलाको मलाङमा स्थानीयको १० लाख र रघुगङ्गा गाउँपालिकाको १० लाख बजेटमा ५ रोपनी जग्गा खरिद गर्ने र सम्याएर व्यवस्थापन गर्ने काम गरिएको थियो ।
भवन उद्घाटन गर्दै गाउँपालिका अध्यक्ष भवबहादुर भण्डारीले आबश्यक सामाग्रीको बन्दोबस्त गरि नवनिर्मित भवनबाट सेवा सुभारम्म गरिएको बताए ।
अध्यक्ष भण्डारीले भवनमा थप औजार उपकरण र औषधीहरुको उपलब्धता गराएर स्वास्थ्य चौकीमा बर्थिङ सेन्टरको समेत सेवा विस्तार गर्ने तयारी गरिएको जानकारी दिए ।
भवन बनाउन रघुगङ्गा गाउँपालिकाले १ करोड ५ लाख ४० हजार ४ सय ४२ र संघीय सरकारको विशेष अनुदानबाट ७३ लाख ९८ हजार ५ सय ९० लगानी भएको छ । आर्थिक बर्ष २०७८/७९ देखि निर्माण सुरु भएको स्वास्थ्य चौकीभवन दुई चरणमा ठेक्का लगाएर निर्माण गरिएको हो।
भवनको तला थप गर्न र भवनको सम्पूर्ण निर्माण सम्पन्न गर्न भगवती/मालिका निर्माण कन्ट्रक्सनले ठेक्का लिएको थियो भने स्थानीय निर्माण व्यवसायि प्रदिप पाईजाले कामको जिम्मा लिएर निर्माण सम्पन्न गरेको हो।
उद्घाटन समारोहमा निर्माण कम्पनीका प्रतिनिधि बिजय भट्टचनले स्वास्थ्य चौकी भवनको चाबी गाउँपालिका अध्यक्ष भण्डारीलाई हस्तान्तररण गरेको छ । भवनमा विरामी चेकजाँच, बर्थिङ सेन्टर, औषधी भण्डारण, कर्मचारी आवास लगायतको लागि छुट्टाछुट्टै कोठाको व्यबस्था गरिएको छ।
भवनको सुरक्षाको लागि पर्खाल निर्माण, तारबार, रङरोगन संगै विद्युत्, खानेपानी जडान गरिएको छ। खुला ठाउँ र फराकिलो कोठाहरु रहेकाले विरामीहरुको चेकजाँच गर्न र सेवाग्राहीलाई समेत सहज रुपमा स्वास्थ्य सेवा लिने सुविधा पुगेको स्वास्थ्य चौकीका प्रमुख हिस्टोरी पाईजाले जानकारी दिए ।
नवनिर्मित स्वास्थ्य चौकी भवनमा बर्थिङ सेन्टर संगै गुणस्तरीय स्वास्थ्य सेवा प्रदानको लागि आबश्यक सामाग्री, उपकरण तथा जनशक्तिको व्यवस्थापन गर्ने वडा कार्यालयको तयारी छ।
विभिन्न टोल बस्तीमा छरिएको चिमखोलामा नागरिकलाई सरल र सहज रुपमा स्वास्थ्य सेवा उपलब्ध गराउनका लागि यस अघि चिमखोलाको पात्लेखेतमा सामुदायिक स्वाथ्य इकाई स्थापना गरिसकिएको छ भने नामेला बस्तीमा समेत सामुदायिक स्वास्थ्य इकाई स्थापना गर्न लागिएको वडा अध्यक्ष थकबहादुर पाइजाले जानकारी दिए ।
रघुगंगा गाउँपालिकामा-१ बेग बाहेकका सबै वडामा स्वास्थ्य चौकी भवन निर्माण भएको छ। भौगोलिक बिकटता रहेको र स्वास्थ्य चौकीमा पुगेर सेवा लिन घण्टौ हिड्नु्पर्ने ठाउँका नागरिका लागि गाउँपालिकाले सामुदायिक स्वास्थ्य इकाई स्थापना गरेर आधारभूत स्वास्थ्य सेवाको पहुँच विस्तार गरिरहेको छ ।
