भोजपुर । भोजपुरको रामप्रसाद राई गाउँपालिका-६, वैकुण्ठेले कृषकलाई व्यावसायिक मौरी पालनमा जोड् दिएको छ। मौरी पालनबाट राम्रो आम्दानी गर्न सकिने सम्भावनालाई ध्यानमा राख्दै मौरी पालनमा जोड् दिएको हो ।
मौरी पालक कृषकलाई आवश्यक प्राविधिक ज्ञानसँगै आधुनिक मौरी घार निर्माणको तालिम दिएपछि किसानहरु उत्साहित भएका हुन्। मौरीबाट किसानलाई आयआर्जनमा जोड्न व्यावसायिक मौरी पालनमा लाग्न आवश्यक कार्यक्रम सञ्चालन गरेको हो।
यहाँका अधिकांश क्षेत्र मौरी पालनको लागि उपयोगी रहेको ठहर गर्दै वडाले किसानलाई आवश्यक प्रविधि ज्ञानसँगै आधुनिक घार निर्माणको तालिम दिएपछि किसानहरु उत्साहित भएका हुन् ।
परम्परागत घारमा मौरी पालन गर्दै आएका किसानहरु आधुनिक घार निर्माणको तालिम पाएपछि स्थानीयस्तरमा चाहिने मह यहि नै उत्पादन हुन थालेको वडा कार्यालयले जनाएको छ । विगतमा परम्परागत रुपमा हुँदै आएको मौरी पालनको लागि आधुनिक प्रविधिको विकासमा जोड् दिनुकाे साथै वडाले किसानलाई मौरी पालन सम्बन्धि दुई चरणको तालिम दिएको थियाे ।
यहाँको बाक्पा र भामला लाई मौरी पालनको लागि उपयुक्त मानिन्छ । किसानलाई स्थानीयस्तरमा नै कृषिबाट आयआर्जनमा जोड्नको लागि योजनाबद्ध रुपमा काम गरिरहेको गाउँपालिकाले जनाएको छ ।
यहाँका कृषि उत्पादन जन्य क्षेत्रको पहिचान गरेर सोहि अनुसारको किसान लक्षित कार्यक्रममा जोड् दिँदै गाउँपालिकाले बार्षिक नीति तथा कार्यक्रममा समावेश गरेर मौरी पालनमा आवश्यक सहयोग गरिरहेको गाउँपालिकाले जनाएको छ ।
दोश्रो चरणमा वडाले घरेलु तथा साना उद्योग विकास कार्यालयसँगको सहकार्यमा यहाँका ३५ जना किसानलाई एक महिने एड्भान्स तालिम दिएको थियाे। मौरी पालन सम्वन्धि तालिम पाएपछि सहजता भएको किसानको भनाइ छ । आधुनिक घारमा मौरी पालन गर्दा उत्पादन बढी हुनेसँगै मौरी भाग्ने जोखिम कम हुने जनाइएको छ ।
प्रकाशित मिति: बुधबार, पुस १७, २०८१ २२:११
