म्याग्दी । बेनीमा आठौ म्याग्दी महोत्सव एवम् प्रदेश स्तरीय कृषि, पर्यटन, औद्योगिक, ब्यापार मेला-२०८१ शुरु भएको छ।
म्याग्दी उद्योग वाणिज्य संघको मुल आयोजनामा माघे संक्रान्ति पर्वको अवसरमा महोत्सव आयोजना गरिएको १० दिनसम्म सञ्चालन हुने महोत्सवमा १ लाख आन्तरिक तथा वाह्य पर्यटक भित्र्याउने र १० करोड बराबरको ब्यापारिक कारोबार हुने अनुमान गरिएको छ।
महोत्सवको नेपाली काँग्रेसका सभापति एवम् पुर्वप्रधानमन्त्री शेरबहादुर देउवाले उद्घाटन गरेको हो। महोत्सवको अवसरमा बेनी बजारमा म्याग्दीमा बसोबास गर्ने विभिन्न जातजाती र संघ संस्थाहरुको मौलिक पहिचान झल्कने झाँकी सहितको र्याली प्रर्दशनी गरिएको थियो ।
महोत्सवमा स्थानीय कृषि, पशुजन्य, घरेलु उद्योग सहित २ सय ३० वटा स्टल रहेका छन्। कला र संस्कृतिको संरक्षण, ब्यापार ब्यवसाय र पर्यटन प्रर्वद्धन गर्ने उद्देश्यले महोत्सव आयोजना गरिएको म्याग्दी उद्योग वाणिज्य संघका अध्यक्ष सुविन श्रेष्ठले बताए।
म्याग्दीको पर्यटन, कृषि, जलविद्युत, खनिज, वन पैदावारजन्य उद्योग ब्यवसायमा लगानी भित्र्याउन, संस्कृति संरक्षण, प्रतिभा पहिचान, प्रर्वद्धन र खेलकुदलाई पनि महोत्सवसँग जोडिएको छ ।
स्थानीय, राष्ट्रिय, अन्तर्राष्ट्रिय औद्योगिक, कृषि तथा पशुजन्य उत्पादनको प्रर्दशनी, पुरुष-महिला भलिबल, बास्केटबल, लोक दोहोरी गित, कलाकारहरुको प्रस्तुति महोत्सवका आकर्षक रहने म्याग्दी उद्योग वाणिज्य संघले जनाएको छ।
त्यस्तै, पुख्र्यौली नाच, रत्यौली गीत, भजन, म्याग्दी आईडल एकल लोकनृत्य, जातजातीको, झाँकी प्रर्दशनी पनि आयोजना गरिएको छ ।
