एजेन्सी । जापानको राजधानी टोकियोमा जारी ३२औँ ग्रीष्मकालीन ओलम्पिक खेलकुदमा चीन ४० पदकसहित शीर्ष स्थानमा उक्लेको छ।
जापान र अमेरिकालाई उछिन्दै चीनले ओलम्पिक खेलकुदमा शीर्ष स्थान ओगट्न सफल भएको हो। चीनले हालसम्म १९ स्वर्ण, १० रजत र ११ कास्य पदक प्राप्त गरेको छ भने जापान दोस्रो तथा अमेरिका तेस्रो स्थानमा रहेका छन्।
जापानले १७ स्वर्ण, ४ रजत र सात कास्य पदक प्राप्त गरेको छ भने अमेरिकाले १४ स्वर्ण, १७ रजत र ११ कास्य प्राप्त गर्न सफल भएको छ। १० स्वर्ण, १४ रजत र १० कास्य पदक प्राप्त गर्दै रसिया ओलम्पिक कमिटी पदक तालिकाको चौथो स्थानमा रहेको छ भने अस्ट्रेलिया ९ स्वर्ण, २ रजत र ११ कास्य पदकका साथ पाँचौँ स्थानमा रहेको छ।
यस्तै बेलायत ७ स्वर्ण, ९ रजत र ९ कास्यसहित छैटौँ, दक्षिण कोरिया ५ स्वर्ण, ४ रजत र ६ कास्यका साथ सातौँ, नेदरल्याण्डस् ३ स्वर्ण, ७ रजत र ५ कास्य जित्दै आठौँ, फ्रान्स ३ स्वर्ण, ५ रजत र ६ कास्यका साथ नवौँ तथा जर्मनी ३ स्वर्ण, ४ रजत र ९ कास्यका साथ पदक तालिकाको १०औँ स्थानमा रहेको टोकियो ओलम्पिकको वेबसाइटमा उल्लेख रहेको छ। टोकियो ओलम्पिकमा सहभागी २०५ देशमध्ये हालसम्म ७० देशले पदक प्राप्त गर्न सफल भएका छन्।
टोकियो ओलम्पिकमा नेपालबाट ४ खेलमा पाँच खेलाडी सहभागी भएका थिए। सुटिङकी कल्पना परियार, जुडोकी सोनिया भट्ट, पौडीका एलेक्स शाह र गौरिका सिंह तथा एथलेटिक्सकी सरस्वती चौधरीले आ आफ्नो खेलमा प्रतिस्पर्धा गरिसकेका छन्।
पाँचै खेलाडी टोकियो ओलम्पिकबाट बाहिरिएको छ। परियारले महिला १० मिटर एयर राइफल, भट्टले महिला ४८ किलो तौल समूह, शाहले १०० मिटर फ्रि स्टाइल, सिंहले १०० मिटर फ्रि स्टाइल तथा चौधरीले १०० मिटर दौडमा प्रतिस्पर्धा गरेका थिए।
प्रकाशित मिति: शनिबार, साउन १६, २०७८ ०९:२२
