– प्रज्वल घिमिरे
(कवि तथा साहित्यकार)
मेचमा ठूला मान्छे घुमेका
सोम रसले झुमेका
आफ्नै पिएलाई चुमेका
किसानले छाक टार्न मकै भुटेका
हुनेखानेले बैंक लुटेका
पार्टी फुटेका
हिजोका सहकर्मीहरु एकआपसमा लड्न जुटेका
सांसदले प्रहरी कुटेका
आफ्ना मान्छेको जीवन बनाउँने
अप्ठ्यारो परे अख्तियारलाई मनाउँने
बाहिर अत्तर छर्कि भित्रभित्रै गनाउँनी
दृष्टिविहिनहरुको लागि आएको रकमबाट
घुम्दै संसार हेर्नी
छिनछिनमा नयाँ नयाँ गाडी फेर्नी
ज्वरो आउँदा सिटामल नपाई गरीब मरेको
खोकी लाग्दा ठूलावडाले युरोप गई उपचार गरेको
किसानलाई मलखाद नपाई सधै खडेरी परेको
एनजिओ आइएनजिओ खोल्नेहरुको घरआँगनमा डलर झरेको
आफू–आफू मैै कहिल्यै मिल्न नसकि छिनछिनमा सरकार गिरेको
कुर्सीकै लागि अपमान सहँदै छिमेकी कहाँ छिरेको
मुलुकको लागि खटेका
जनताको हक र हितमा डटेका
खराब मान्छेहरुको जमातबाट पर हटेका
सञ्चारकर्मीहरुलाई दुख दिई जनतालाई पछाडी पारेको
मुलुक हारेको
जस्ता नकारात्मक समाचार सम्पे्रषित गर्न मन लाग्ला?
त्यस्तै हामी जनताका लागि पनि
अस्वाभिमान, असमानता, अन्याय र अमानवीय घटनाहरु समेटेर बनेको
आफ्नो लागि आफैले खाल्डो खनेको
समाचारहरु पढ्न नपर्ने दिन कहिले आउला?
स्वाभिमान, समानता, न्याय र नैतिकताको समाचार पढ्न पाई
मन मष्तिष्कले आनन्द कहिले पाउला ?
(नामी साप्ताहिकबाट साभार)
प्रकाशित मिति: शुक्रबार, भदौ ४, २०७८ १६:५४
