नेपालमा यतिखेर प्रमुख राजनीतिक दलहरू महाधिवेशनमा होमिएका छन् । नेपाली कांग्रेस, नेकपा (एमाले), नेकपा (माओवादी केन्द्र), राष्ट्रिय प्रजातन्त्र पार्टी (राप्रपा) लगायतका दलहरू महाधिवेशनमा होमिएका हुन् । स्थानीय तहको निर्वाचनअघि महाधिवेशन सक्ने राजनीतिक दलहरूको योजना रहेको छ।
यसअनुरुप प्रमुख राजनीतिक दलहरुलाई किसानलाई बाली उठाउने मंसीरको चटारो जस्तै राजनीतिक दलहरुलाई महाधिवेशन सक्ने चटारो परेको हो। यो चटारोले गर्दा राजनीतिक दलहरु स्थानीय देखि नगर र केन्द्रिय कमिटीसम्म चलायमान बनिरहेको छ। अझैपनि कोरोनाको महामारी नसकेको वर्तमान अवस्थामा राजनीतिक दलहरुको भीडम् भीड चलखेलपूर्ण महाधिवेशनले कार्यकर्ता देखि नेतासम्म र स्थानीय सवैमा जोखिम बढाउने हो कि भन्ने डर पनि रहेको छ।
कोरोनाको डरलाई गोली मारो गरेर विभिन्न पार्टी प्यालेस लगायतका स्थानहरुमा सभा–सम्मेलन अनि निर्वाचन लगायतका कार्यहरु गर्ने काम पनि राजनीतिक दलहरुले गर्दैआएको छ। यतिखेर मुलुकको प्रतिपक्ष दलको रुपमा रहेको नेकपा (एमाले)ले विधानको विषय टुंग्याउन गत असोज १५ देखि १७ गतेसम्म विधान महाधिवेशन गरकोमा यही मंसिर १० देखि १२ गतेसम्म दशौं महाधिवेशन चितवनमा भव्य रुपमा गर्दैछ।
विधान महाधिवेशनमा राजनीतिक तथा संगठनात्मक प्रतिवेदन र विधान पास भइसकेकाले नेकपा एमालेको अब सिधै नेतृत्व चयनका लागि निर्वाचन मात्रै हुनेछ । महाधिवेशनका लागि १ हजार ९ सय ९९ जना प्रतिनिधि छनोट भएका छन् । चितवनमा एमाले नेताहरूको भीड बाक्लिन थालेको छ।
सरकारको बागडोर हाँकिरहेको नेपाली कांग्रेसले पटक–पटक १४ औँ महाधिवेशनको मिति सार्दै आएको कांग्रेसले पछिल्लो पटक मंसिर २४ देखि २६ गतेसम्म महाधिवेशन गर्नेगरी समय तोकेको छ।
राष्ट्रिय प्रजातन्त्र पार्टी (राप्रपा)ले पटक–पटक महाधिवेशनको मिति सार्दै आएको राष्ट्रिय प्रजातन्त्र पार्टी(राप्रपा)ले पनि मंसिरको ११ देखि १३ गतेसम्म काठमाडौंमा एकता महाधिवेशन गर्दैछ। २०७६ फागुनमा कमल थापा नेतृत्वको राप्रपा र पशुपति शमशेर राणा तथा प्रकाशचन्द्र लोहनी नेतृत्वको राप्रपा(संयुक्त) बीच पार्टी एकीकरण भएपछि पहिलोपटक महाधिवेशन हुन लागेको हो।
नेकपा एमाले, कांग्रेस र राप्रपाको महाधिवेशन सकिए लगत्तै माओवादी केन्द्रको राष्ट्रिय सम्मेलन हुने क्यालेण्डर पनि सार्वजनिक भएको छ। माओवादीले आगामी पुस ११ देखि १३ गतेसम्म राष्ट्रिय सम्मेलन गर्ने तयारी गरेको छ। काठमाडौमा हुने सम्मेलनअघि वडा, गाउँ÷नगरपालिका, प्रदेशस्तरीय लगायतका भेला र बैठक सम्पन्न गर्ने माओवादीको तयारी छ।
एमाले विभाजित भएर बनेको नेकपा (एकीकृत समाजवादी)ले पनि राष्ट्रिय सम्मेलनको तयारी गरेको छ। उता, जनता समाजवादी पार्टी(जसपा)ले पनि महाधिवेशन गर्ने तयारी गरेको छ । तर, उसले पनि मिति भने तय गरेको छैन्। यस हिसावले राजनीतिक दलहरुको महाधिवेशनले काठमाडौं, चितवन लगायतका स्थानमा कुम्भमेला लाग्दैछन्। सवैको ध्यान महाधिवेशनरुपी राजनीतिक दलहरुको कुम्भमेलातिर भएको छ।
राजनीतिक दलहरुको महाधिवेशनरुपी कुम्भमेलाले अर्को कोरोना फैलिने पो हो कि भन्ने डर यथावत रहेतापनि मुलुकको राजनीतिकि स्थिरतामा आगामी स्थानीय निर्वाचनको सेरोफेरोले व्यापक तरलता ल्याउने हो कि भन्ने आशंका पनि गरिएको छ। महाधिवेशन देखि तिनै तहको निर्वाचन सवै राजनीतिक दलहरुका लागि पेचिलो बन्दैगएको छ।
प्रकाशित मिति: आइतबार, मंसिर ५, २०७८ ०८:२५
